BQO-da óndiristegi jazataıym oqıǵalardan 10 adam qaza tapty
BQO eńbek ınspektsııasy basqarmasynyń basshysy Asylulan Dosjanov óńirlik kommýnıkatsııalar qyzmeti alańynda ótken brıfıngide málim etkendeı, ótken jyly 7 aıda 32 jazataıym oqıǵa bolǵan.
Onyń sózine qaraǵanda, bıyl jazataıym oqıǵalardan 39 (ótken jyly osy merzimde – 37) adam zardap shekse, sonyń 20-sy (25) aýyr dep baǵalandy. 9 adam (8) toptyq oqıǵadan jaraqat aldy. 10 adam qaza tapty, bul ótken jylǵydan (4) 60 paıyzǵa kóp.
«Sonyń ishinde 5 adam qurylys salasyndaǵy kásiporyndarda qaıtys boldy. Tórt jumysshy bıiktikten qulasa, bireýi jerdiń opyrylýy saldarynan kóz jumdy», - dedi basqarma basshysy.
Sonymen qatar, jol-kólik oqıǵasynan (2 adam) jáne qozǵalatyn, ushatyn, aınalatyn zattar men bólshekterdiń soǵýynan (1 jaǵdaı) bıýdjettik uıymnyń 3 qyzmetkeri mert boldy.
Aýyl sharýashylyǵy salasynda 2 qyzmetker kóz jumdy. Onyń bireýi jumys ornynan shyǵyp, belgisiz jaǵdaıda shóp usaqtaǵyshqa túsip qalǵan. 1 jumysshyny (qus ósirýshi) tsehqa tıeý aımaǵynda (belgisiz sebeptermen bolǵan) traktor júrgizýshisi artqa bergeninde baıqamaı basyp ketken.
«Jazataıym oqıǵalarǵa júrgizilgen arnaıy tergep-tekserý nátıjesi kórsetkendeı, negizgi sebepter – jumystyń tıisinshe uıymdastyrylmaýy, qyzmetkerlerdi jeke qorǵanys quraldarymen qamtamasyz etpeý, eńbektiń qaýipsiz tásilderine oqytýdyń jetkiliksizdigi, sondaı-aq zardap shegýshilerdiń ózderiniń óreskel abaısyzdyǵy. Taǵy bir atap ótetin jaıt, jumys berýshiler qyzmetkerlerdi eńbek qaýipsizdigi jáne eńbekti qorǵaý máseleleri boıynsha oqytý, nusqaý berý, bilimderin tekserýdi júrgizbeıdi. Qyzmetkermen eńbek shartyn jasaspaı, jumysqa jiberedi, jumys oryndarynda jáne tehnologııalyq protsesterde jazataıym oqıǵalardy boldyrmaý maqsatynda aldyn alý sharalaryn júrgizbeıdi. Oǵan qosa, jazataıym oqıǵalar jasyryn qalyp jatady», - dedi A. Dosjanov.
