BQO-da «Nur Otan» praımerızine qatysýǵa ótinish bildirgenderdiń 40 paıyzy – áıelder
«Nur Otan» partııasy BQO fılıaly tóraǵasynyń birinshi orynbasary Murat Muqaevtyń brıfıngte málim etkenindeı, óńirde úmitkerlerdi usyný men tirkeý 17 tamyzda bastalyp, 28-ine deıin jalǵasady.
Qazirdiń ózinde oblys boıynsha 167 adam nıet tanytyp, 40 paıyzy áıelder bolsa, sonyń ishinde altaýy – kóp balaly analar. Sondaı-aq jastar da qushtarlyq tanytýda, olar ótinish bildirgenderdiń 35 paıyzyn qurap otyr. Praımerızge ár túrli jastaǵy, túrli sanattaǵy adamdardy tartý kózdelýde. Kúni búgin bul jóninen Oral qalasy, Bórli, Aqjaıyq jáne Jańaqala aýdany turǵyndary belsendilik kórsetýde.
-Bıylǵy praımerızdiń ereksheligi, onyń ashyq jáne jarııaly túrde ótetindigi. Úmitkerlerdi bastaýysh partııa uıymdary usynady. Sonymen qatar ózin-ózi usynýǵa da bolady.
Praımerızge partııa múshelerimen qatar aıtar oı-pikiri bar, ózine senetin, aldaǵy ýaqytta el múddesi úshin qyzmet atqaramyn dep bel býǵan azamattar da qatysa alady. Biz olardy partııa músheligine alyp, óz baqtaryn synaýǵa jaǵdaı jasaımyz, - deıdi M.Muqaev.
Úmitkerlerge úgit jumystaryna daıyndalý jeti kún (31 tamyzdan 6 qyrkúıekke deıin) beriledi. Sodan soń úgit jumystary bastalyp, kandıdattar jarııa pikirsaıystarǵa qatysady.
Elektrondy daýys berý 1-3 qazan aralyǵynda ótip, daýys berýdiń sońǵy kúni bastaýysh partııa uıymdarynyń bazasynda saılaý ýchaskeleri ashylady. Internet joq eldi mekenderde osyndaı saılaý ýchaskesine kelip, qaǵaz bıýlletender arqyly daýys berýge bolady. Oblys boıynsha 50 saılaý ýchaskesi belgilendi. Kandıdattardyń reıtıngteri kórsetilgen praımerız nátıjeleri 5 qazanda jarııalanady.
Daýys berýdi uıymdastyrý jáne ótkizý, onyń qorytyndylaryn aıqyndaý maqsatynda óńirlik, aýmaqtyq jáne ýchaskelik esep komıssııalary quryldy.
«Oblysta 27 myń partııa múshesi bolsa, solardyń 85 paıyzy onlaın túrde daýys beredi dep otyrmyz. Al ınterneti joq shalǵaı eldi mekenderde daýys berý dástúrli túrde ótedi»,
dedi Murat Muqaev.
Eske sala keteıik, budan buryn oblys ákimi Ǵalı Esqalıev partııaishilik saılaý ózderine senimdi kóshbasshylardy anyqtaıtyny jóninde aıtqan bolatyn.
