BQO-da merdiger mektepti kúrdeli jóndeý jumysyn sebepsiz sozǵan
ORAL. KAZINFORM – Batys Qazaqstan oblysynda bilim berý nysandarynda kúrdeli jóndeý jumysyn merziminde aıaqtamaý derekteri anyqtaldy.
QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtyń óńirlik kommýnıkatsııalar qyzmeti alańynda ótken brıfıngte málim etkenindeı, Aqjaıyq aýdany Bazartóbe aýylyndaǵy mektepti jóndeý 2022 jyly 4 tamyzda bastalyp, 2023 jyly 19 naýryzda tapsyrý kózdelgen.
Ádilhan Bádelhanulynyń sózine qaraǵanda, merdigerdiń kinásinen jóndeý merzimi birneshe ret uzartylǵan.
Tek departamenttiń aralasýynan keıin qurylys-montajdaý jumystaryn 2024 jyly 30 naýryzda aıaqtaý jóninde jańa keste jasaldy.
«Merdigerge qatysty ony memlekettik satyp alýǵa josyqsyz qatysýshy dep taný týraly talap qoıylyp, qanaǵattandyryldy. Sot sheshimimen atalmysh JShS memlekettik satyp alýǵa josyqsyz qatysýshylardyń respýblıkalyq tizilimine engizildi. Búgingi tańda jóndeý jumystary tolyǵymen aıaqtaldy», - dedi Á.Sabýrov.
Departament basshysynyń aıtýynsha, sol sekildi Oral qalasyndaǵy «Shańyraq» jasóspirimder úıiniń jataqhanasyn jóndeý jumystary belgilengen merzimde (2024 jylǵy qańtar) bitpedi. Departament usynysy boıynsha nysandaǵy jumystar jandandyrylyp, kúni búgin jóndeý tolyq kólemde aıaqtaldy. Jasóspirimder úıiniń basshysy tártiptik jaýapkershilikke tartyldy, merdigerge qatysty talap aryz sotta qaralýda.
«Bilim berý uıymdarynda qarajatty josparlaý jáne jumsaý salasyna monıtorıng júrgizý barysynda Syrym aýdanynyń 1 195 qyzmetkerine jalpy somasy 259 mln teńgege erekshe eńbek jaǵdaılary úshin laýazymdyq jalaqynyń 10 paıyzy mólsherinde ústemeaqy tólenbegeni anyqtaldy. Departamenttiń aralasýynan keıin Syrym aýdanynyń bilim berý bólimi tarıfteý tizimine ózgerister engizip, jalaqy qaıta esepteldi. Kináli adamdar tártiptik jaýapkershilikke tartyldy. Sondaı-aq qarjylandyrý josparlaryn, tarıfteýdi jáne shtat kestesin zerdeleý arqyly bilim berý uıymdarynyń 2024 jylǵa arnalǵan bıýdjet qarajatyn 249,4 mln teńge mólsherinde tıimsiz jumsaýyna jol berilmedi», - dedi Á.Sabýrov.
