BQO-da memlekettik tildi meńgergen turǵyndar úlesin 93,5 paıyzǵa jetkizý kózdelýde
BQO tilderdi damytý basqarmasynyń basshysy Erlan Ǵalıevtiń óńirlik kommýnıkatsııalar qyzmeti alańynda ótken brıfıngide málim etkenindeı, bıyl sondaı-aq memlekettik tilde oqytatyn mektepterdegi oqýshylar sanyn arttyrý baǵytynda qoǵam belsendileriniń qatysýymen 1-synypqa baratyn balalardyń ata-analarymen «Urpaǵyńa ıe bol, aǵaıyn!» taqyrybynda kezdesýler ótkizý josparlanyp otyr.
Onyń aıtýynsha, qazaq tilinde bilim alyp, qoǵamnyń ár salasynda jetistikterge jetip, álemge tanymal bolyp júrgen Aq Jaıyq óńirinen shyqqan tulǵalarmen kezdesý uıymdastyrylyp, tabystary týraly beınerolıkter daıyndalady.
Sol sekildi óńirdegi aqparattardy birizdendirý maqsatynda oblys turǵyndaryna arnalǵan «Saýatty jarnama – til abyroıy» atty baıqaý ótedi.
E.Ǵalıvtiń sózine qaraǵanda, oblysta 372 kúndizgi jalpy bilim berý uıymy jumys jasaıtyn bolsa, sonyń 250-i (68 paıyzy) qazaq tilinde bilim men tárbıe berýde.
Oǵan qosa Batys Qazaqstan oblystyq tilderdi damytý basqarmasy eresekterge arnalǵan qazaq jáne aǵylshyn tilderin tegin oqytý kýrsyna qabyldaý júrgizýde. Qabyldaý naýryz aıynyń sońynda aıaqtalady.
Sonymen qatar 2021 jyly Batys Qazaqstan oblystyq tilderdi damytý basqarmasy janynan qazaq tilin jetildirgisi kelgen ózge etnos ókilderine jáne barlyq tilek bildirýshilerge arnalǵan «Sóıletime» klýby iske qosylyp, nátıjeli jumystar júrgizildi.
Klýb músheleri túrli áleýmettik nysandarǵa baryp, qyzmetterdi halyqqa memlekettik tilde kórsetý qajettigi boıynsha shaqyrý aktsııasyn ótkizdi. Jalpy, «SóıleTime» klýbynyń jumysyna 18-35 jas aralyǵyndaǵy 75 etnos ókilderi qatysty. Atalmysh klýbtyń jumysy bıyl da jalǵasady.
Ana tilin meńgerýge nıet bildirgen Reseı Federatsııasynda turatyn qazaq dıaspora ókilderine onlaın 100 saǵat kóleminde qazaq tilinen A2 deńgeıinde 25 adamǵa arnalǵan tegin sabaqtar júrgiziletin bolady.
Qazaq tilin IT tehnologııalar arqyly meńgertýdiń de tıimdiligi mol. Sabaq barysynda IT tehnologııalardy jıi qoldanyp oqytýdyń qajettiligi oqytý sapasynyń artýyna zor yqpalyn tıgizýde.
Shaısultan Shaıahmetov atyndaǵy «Til-Qazyna» ulttyq-praktıkalyq ortalyǵy daıarlaǵan Tilqural.kz Qazlatyn.kz, Sozdikqor.kz, Tilmedia, Qujat.kz, Atau.kz, Emle.kz, Termincom.kz, ILES, Zerek bala, Sózdi tap, Jasyryn sóz veb-servısterin Android nemese iOS (AIOS) arqyly telefonǵa júkteý arqyly qoldaný múmkindigi bar.
Memlekettik mekemelerden jınaqtalǵan aqparatqa qaraǵanda, oblys boıynsha qujat aınalymdaǵy memlekettik tildiń úlesi 2021 jyldyń 4 toqsanynda 97,5 paıyzdy qurady.
«BQO ákimdigi janyndaǵy oblystyq onomastıka komıssııasynyń qorytyndysy boıynsha onomastıkalyq jumystar zańnamalarǵa sáıkes júrgizilip, tıisti normatıvtik quqyqtyq aktilermen bekitilip, is júzinde asyrylyp keledi. Aıtalyq, «Oral» halyqaralyq áýejaıyna Mánshúk Mámetovanyń esimin berý týraly qaýly jobasy Qazaqstan Respýblıkasy Úkimetiniń qaraýyna eńgizildi», dedi E.Ǵalıev.
Eske sala keteıik, budan buryn Batys Qazaqstanda 250 mekteptiń memlekettik tilde dáris beretinin jazǵan bolatynbyz.