BQO-da mektep ǵımaratynda shashtaraz ornalasqan – bilim basqarmasy jaýap berdi

ORAL. KAZINFORM – Batys Qazaqstan oblysy Terekti aýdany Qumaqsaı aýylyndaǵy mektep ǵımaratynda shashtaraz ornalasqany jóninde áleýmettik jelide beınejazba tarady. 

Beınejazbada áıel adam burynǵy muǵalimder bólmesin jergilikti ákimdik alyp, shashtarazǵa jalǵa berip otyrǵanyn aıtady.

– Shashtarazǵa balalar oqıtyn synyp ta jaqyn ornalasqan. Shashtaraz bólmesine kez kelgen adam kirip shyǵady. Sonda oqýshylardyń qaýipsizdigi qalaı qamtamasyz etilmekshi? Sonymen qatar osy jerdegi ájethanalar kiltteýli, ısi sasyp tur. Oǵan balalardyń barýyna da ákimdik ruqsat etpeı otyr, - deıdi áıel. 

Terekti aýdany bilim berý bóliminiń basshysy Mıras Saparǵalıevtiń aıtýynsha, Qumaqsaı aýyly Y.Altynsarın kóshesinde ornalasqan ǵımarattyń beınejazbada kórsetilgen bóligi Terekti aýdany ekonomıka jáne qarjy bóliminiń 2020 jylǵy 10 jeltoqsandaǵy № 89 buıryǵyna sáıkes aýdandyq bilim berý bóliminen Qumaqsaı aýyldyq okrýgi ákimdiginiń teńgerimine berilgen. 

– Beınejazbada kórsetilgen kabınette áleýmettik shashtaraz ashý josparlanyp, qajetti quraldar qoıylǵan. Alaıda kúni búginge deıin shashtaraz jumysyn bastaǵan joq. Shashtaraz jumys jasaǵan kúnniń ózinde oǵan kelýshi azamattarǵa bólek kiretin esik qarastyrylǵan. Novopavlov jalpy orta bilim beretin mektep oqýshylary men qyzmetkerlerine arnalǵan basqa jumys isteıtin ájethanalar bar. Qajettilik týyndaǵan jaǵdaıda beınejazbada kórsetilgen ájethanalardy da paıdalanýǵa berýge bolady, - dedi M.Saparǵalıev.

BQO bilim basqarmasynyń basshysy Eldos Safýllın oqıǵa ornynda shuǵyl bolyp, máselemen tanysqanyn jetkizdi.

– Mekteptiń atalmysh bóligi aýdandyq bilim berý bólimine keri qaıtarylatyn bolady. Tıisti sheshimder zań aıasynda qabyldanady, - dedi Kazinform tilshisine E.Safýllın.

Eske sala keteıik, budan buryn Oralda mektep qabyrǵasyndaǵy kirpishter qulap jatqanyn jazǵan bolatynbyz.