BQO-da mas kúıinde kólik aıdaǵan 1 500-den astam júrgizýshi ustaldy

ORAL. KAZINFORM — Batys Qazaqstan oblysynda ótken jyly 1 260 jol-kólik oqıǵasy boldy.

BQO polıtsııa departamenti ákimshilik polıtsııa basqarmasy bastyǵynyń orynbasary Nurbol Meńdihanovtyń óńirlik kommýnıkatsııalar qyzmeti alańynda ótken brıfıngte málim etkenindeı, bul aldyńǵy jylǵydan (1 196) 5 paıyz artyq.

Nurbol Isataıulynyń sózine qaraǵanda, osy jol apattary saldarynan jaraqat alǵandar sany 13 paıyzǵa (1 760-tan 1 980-ge deıin) ósti.

— Jol-kólik oqıǵalarynyń negizgi sebepteri — jol qozǵalysyna qatysýshylardyń tártip deńgeıiniń tómendigi, ınfraqurylymnyń tozýy jáne avtokólik parkteriniń kóbeıýi. Osyǵan baılanysty jol qozǵalysyna baqylaý kúsheıtilip, apat deńgeıi joǵary ýchaskeler baqylaýǵa alyndy. Jol qozǵalysyn baqylaýdyń avtomattandyrylǵan keshenderiniń jelisi keńeıtilip, joldardyń kútip-ustalýy qatań qadaǵalanýda, — dedi N.Meńdihanov.

Onyń aıtýynsha, jol qozǵalysy erejelerin buzý kórsetkishi de 2 paıyz (251 638-den 256 230-ǵa deıin) artty. Mas kúıinde kólik aıdaǵan 1 546 júrgizýshi ustaldy.

Apattylyq deńgeıi men táýlik ýaqytyna baılanysty qozǵalys qarqyndylyǵyn eskere otyryp, 20 «Kıber-Sherıf» mobıldi kesheni kún saıyn qaıta ornalastyrylyp jatyr. Oǵan qosa 2025 jyly jańadan 10 mobıldi júıe satyp alyndy, onyń ishinde 5 «Ekin Patrol» jáne jasyryn baqylaý júrgizý úshin 5 «X Spotter» kesheni bar, olardyń bireýi qalalyq qoǵamdyq kólik baǵytyna ornatylǵan (barlyǵy — 125 avtomattandyrylǵan fotofıksatsııa júıesi).

Departament málimetine qaraǵanda, qabyldanǵan sharalardyń nátıjesinde 2025 jyly jol-kólik oqıǵalarynan qaza tapqandar sany 21 paıyzǵa azaıdy (103-ten 81-ge deıin), onyń ishinde balalar ólimi 38 paıyz tómendedi (13-ten 8-ge deıin). Bıylǵy jyl basynan beri oblys aýmaǵynda 60 jol-kólik oqıǵasy (ótken jyly osy merzimde — 64) tirkelip, saldarynan 4 adam qaza taýyp, 100 adam túrli jaraqat aldy.

— Bıyl jergilikti atqarýshy organdardyń qoldaýymen «2024–2028 jyldarǵa arnalǵan qoǵammen áriptestikte qoǵamdyq qaýipsizdikti qamtamasyz etý tujyrymdamasyn» júzege asyrý aıasynda jol qozǵalysy erejelerin buzýdy tirkeıtin qosymsha 17 mobıldi jáne 50 statsıonarlyq avtomattandyrylǵan júıe satyp alý josparlanyp otyr. Sonymen qatar, múddeli memlekettik organdarmen birlesip 2026–2028 jyldarǵa arnalǵan jol qozǵalysy qaýipsizdigin arttyrý jónindegi «Jol kartasy» ázirlendi, — dep qosty N.Meńdihanov.

Eske sala keteıik, budan buryn BQO-da bir kúnde 500-den astam jol erejesin buzý deregi tirkelgenin jazǵan edik.