BQO-da qutqarýshylar sý ortasynan jylqylardy alyp shyqty
ORAL. KAZINFORM — Batys Qazaqstan oblysynda qutqarýshylar sý ortasynan jylqylardy alyp shyqty.
BQO TJ departamentiniń baspasóz qyzmetinen málim etkenindeı, oqıǵa 21 sáýir kúni Aqjaıyq aýdany aýmaǵynda boldy.
«Batys Qazaqstan, Túrkistan jáne Qyzylorda oblysy TJ departamentiniń qutqarýshylary Býdarın, Kolovertnoe jáne Jańabulaq aýyly mańynda Jaıyq ózeninen dalaǵa jaıylǵan sý ortasynan shamamen 137 jylqy, sonyń ishinde 3 qulynshaqty aıdap shyǵaryp, ıesine tabys etti», dep habarlady vedomstvodan.
Býdarın aýylynyń turǵyny Erjan Bıtileýov malyn aman alyp qalǵan qutqarýshylarǵa alǵysyn aıtty.
«21 sáýir kúni bir úıir jylqym Jaıyq sýynyń ortasynda qalyp qoıyp, Aqjaıyq aýdanynan órt sóndirý bóliminen jáne Qyzylorda oblysynan kelgen jigitter qaıyǵymen kómektesti. Bárine myń alǵys!», dedi E.Bıtileýov.
Aqjaıyq aýdanynyń ákimi Murat Serdalın mundaı oqıǵanyń tek bireý ǵana emestigin jetkizdi.
«Jaıyqtyń joǵary jaǵynan aýdanymyzǵa mol sý kelip jatyr. Mal qansha aıdasaq ta, úırengen jerlerine qaıta oralyp, sýdyń ortasynda qalyp jatqandary bar. Jalpy, aýdanymyzda 45 eldi meken bolsa, sonyń 32-si Jaıyq boıynda ornalasqan. Ózender jaǵalaýynda bógetter turǵyzyp, barynsha qamdanys jasadyq», dedi M.Serdalın.
Eske sala keteıik, budan buryn Jaıyq ózenindegi sý deńgeıi Oral qalasy tusynda 864 santımetrdi kórsetkenin jazǵan bolatynbyz.
