BQO-da qostanaılyq turǵyn 2 myń doza esirtkimen qolǵa tústi

ORAL. KAZINFORM - Batys Qazaqstan oblysynda esirtki tasymaldaýshy ustaldy.

BQO polıtsııa departamentiniń baspasóz qyzmetinen málim etkenindeı, onyń Qostanaı oblysy turǵyny, Telegram arnasy arqyly esirtki tasymaldaýshy retinde jumysqa turǵany anyqtaldy.

Er adamdy jeke tekserý barysynda kúrteshesiniń qaltasynan jabysqaq taspamen oralǵan, ishinde untaq zaty bar 29 zip-paket tabyldy. Sonymen qatar qol sómkesinen osyndaı 49 zip-paket tárkilendi.

 — Tergeý barysynda kúdikti toqtaǵan qonaqúı bólmesinen de esirtki zattary tabyldy. Seıften untaq zatqa uqsas 205 zip-paket shyqty. Saraptama nátıjesinde bul zattyń jalpy salmaǵy 478 gramm bolatyn mefedron psıhotroptyq zaty ekeni belgili boldy. Bul — 2 myńnan astam bir rettik doza. Kúdikti ýaqytsha ustaý ızolıatoryna qamalyp, atalǵan derek boıynsha sotqa deıingi tergeý amaldary júrgizilýde -, dep habarlady vedomstvodan.

Eske sala keteıik, budan buryn Oralda 17 jastaǵy jasóspirimniń esirtkimen ustalǵanyn jazǵan bolatynbyz.