BQO-da qos azamattyǵyn jasyrǵan áıelge aıyppul salyndy

ORAL. KAZINFORM — Oral qalasynyń ákimshilik quqyq buzýshylyqtar jónindegi mamandandyrylǵan soty azamatsha V-ǵa qatysty ákimshilik isti qarady.

BQO sotynyń baspasóz qyzmetinen málim etkenindeı, áıeldiń 2022 jyldyń qyrkúıeginde alǵan Reseı Federatsııasynyń azamattyǵy bar ekeni anyqtalǵan, alaıda ol bul týraly ýákiletti organdarǵa ýaqytyly habarlamaǵan. 

Іs QR Ákimshilik quqyq buzýshylyqtar týraly kodeksiniń 496-baby 2-bóligine (ózge memlekettiń azamattyǵy týraly ýákiletti organdarǵa habarlamaý) sáıkes qozǵalǵan.

Sotta azamatsha shetel azamattyǵyn alǵannan keıin Qazaqstan Respýblıkasynyń memlekettik organdaryn habarlaý jónindegi zańmen bekitilgen mindetin oryndamaǵany belgili boldy. 

Sot otyrysynda quqyq buzýshy óz kinásin tolyq moıyndady, bul jaǵdaı sotpen jeńildetetin mán-jaı retinde eskerildi.

- Barlyq mán-jaılardy eskere otyryp, sot V-ny atalmysh kodekstiń 496-baby 2-bóligi boıynsha ákimshilik quqyq buzýshylyq jasaǵany úshin kináli dep tanyp, oǵan 393 200 teńge mólsherinde ákimshilik aıyppul saldy. Qaýly zańdy kúshine engen joq. 

Eske sala keteıik, budan buryn Oralda jalǵan nómir taǵylǵan kólikti júrgizgen áskerı qyzmetshiniń jaýapqa tartylǵanyn jazǵan bolatynbyz.