BQO-da kıik múıizderin tastap qashqan brakoner 3 kúnnen keıin ustaldy

ORAL. QazAqparat – Batys Qazaqstan oblysynda 280 dana kıik múıizin tasymaldaǵan júrgizýshi ustaldy, dep habarlaıdy QazAqparat tilshisi.

«Ohotzooprom» ÓB» RMQK-dan alynǵan málimetke qaraǵanda, 4 maýsym kúni saǵat 23.30 shamasynda Atyraý-Oral jolynyń Aqjaıyq aýdany Chapaev aýyly tusynda «Suzuki Grand Vitara» avtokóligi toqtatyldy.

Qujattardy tekserý kezinde kúdikti kóligimen Oralǵa qaraı qashyp ketken.

«Oqıǵa ornyn qaraý kezinde 280 dana kıik múıizi tabylyp, tárkilendi. Atalǵan derek boıynsha QR QK-niń 339-1-baby 1-bóligine sáıkes qylmystyq is qozǵaldy», - delingen «Ohotzooprom» aqparatynda.

BQO Polıtsııa departamentiniń resmı ókili Bolatbek Belgibekovtiń naqtylaýynsha, kólik rýlinde 33 jastaǵy azamat bolǵan. Ol Atyraý-Oral jolynyń 382-shaqyrymynda burylyp, dalalyq jolǵa túsken. Sol jerde óziniń qujattaryn tastap ketken.

7 maýsym kúni jedel izdestirý sharalary barysynda polıtsııa qyzmetkerleri onyń júrgen ornyn anyqtap, qolǵa túsirdi.

Eske sala keteıik, budan buryn BQO-da 227 dana kıik múıizin satpaq bolǵandardyń sottalǵanyn jazǵan bolatynbyz.