BQO-da qar basý qaýpi bar 178 jol ýchaskesi tirkelgen
ORAL. KAZINFORM – Batys Qazaqstan oblysynda qar basý qaýpi bar jalpy uzyndyǵy 400 km 178 jol ýchaskesi bolsa, sonyń 65-i (125 km) – respýblıkalyq, 113-i (275 km) oblystyq joldardyń úlesine tıedi.
BQO TJD tótenshe jaǵdaılardy joıý basqarmasynyń bastyǵy Nuraly Mýsıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sondaı-aq 40 jylytý pýnkti (respýblıkalyq joldarda – 6, oblystyq – 12, aýdandyq – 22), 10 500 býma metr qar ustaý qalqandary daıyndaldy.
Onyń sózine qaraǵanda, aldaǵy qysqy kezeńde oblys boıynsha 3 925 adam jáne 1 404 tehnıka jumysqa tartylatyn bolsa, sonyń ishinde 950 adam men 60 tehnıka TJD bólimshelerine tıesili.
«Departament qyzmetkerleri BQO jolaýshylar kóligi jáne avtomobıl joldary basqarmasymen jáne BQO polıtsııa departamentimen birlesip, jol qyzmetteriniń respýblıkalyq jáne oblystyq mańyzy bar avtojoldardy qysqy kútip ustaýǵa daıyndyǵynyń jaı-kúıine tekserý júrgizdi. Oblys aýmaǵyndaǵy avtomobıl joldarynyń uzyndyǵy 6 176 km bolsa, sonyń 1 342-si – respýblıkalyq, 1 692-si – oblystyq, 3 142-si – aýdandyq mańyzy bar joldar», deıdi N.Mýsıev.
Onyń aıtýynsha, ótken qysta aýa raıynyń nasharlaýyna baılanysty avtomobıl joldary 111 ret jabylyp, 11 márte shekteý engizilgen. Soǵan oraı TJD kúshterimen (68 adam, 25 tehnıka) 112 adam evakýatsııalanǵan.
«Aıta ketý kerek, kóbinese joldardyń jabylǵany týraly SMS-habarlamalardy jáne aýa raıynyń nasharlaǵanyn elemeıtin azamattar qar qursaýynda qalady. Sondaı-aq eskertýge qaramastan, aýyldyq jerlerde turǵyndar mal izdeýge shyǵyp, adasyp ketedi. Ótken qysta 16 ret izdestirý-qutqarý jumystary júrgizilip, bári sátti aıaqtaldy. Biraq mundaı oqıǵalardyń sońy qaıǵyly jaǵdaıǵa soqtyrýy múmkin ekendigin esten shyǵarmaý qajet. Qazirgi tańda oblystyń barlyq aýdandarynda jergilikti atqarýshy organdarmen birlesip izdestirý-qutqarý jumystaryn júrgizýge jumyldyrý úshin mobıldi toptar quryldy. Departamenttiń barlyq bólimshelerinde tehnıkalardyń qysqy kezeńge daıyndyǵyna tekserister júrgizildi. Olar janar-jaǵarmaı materıaldarymen qamtamasyz etilgen. Departament bólimsheleriniń ótimdiligi joǵary 56 tehnıkasy avtomobıl joldarynyń neǵurlym kúrdeli ýchaskelerine bekitildi, sonyń ishinde tórteýi basqa bólimshelerge kóshirildi», dedi N.Mýsıev.
Eske sala keteıik, budan buryn Oral qalasynda kóshe joldary qardan qalaı tazartylmaqshy ekendigin jazǵan bolatynbyz.
