BQO-da dárigerler kesirinen qaterli isikke shaldyqqan 58 naýqastyń quqyǵy buzylǵan

ASTANA. KAZINFORM — Búginde onkologııalyq dıspanserdiń kináli qyzmetkerleri jaýapkershilikke tartyldy. Bul týraly BQO prokýratýrasynyń baspasóz qyzmeti málim etti.

Batys Qazaqstan oblysynyń prokýratýrasy medıtsınalyq uıymdardyń onkologııalyq aýrýǵa shaldyqqan azamattardyń quqyqtaryn saqtaý máselelerine taldaý jasady. Bul salada júıeli buzýshylyqtar anyqtaldy.

— Dárigerler Medıtsınalyq-áleýmettik saraptama júrgizý erejeleriniń talaptaryn saqtamaǵan. Atap aıtqanda, qaterli isikpen aýyratyn jáne dene fýnktsııalarynyń turaqty buzylýy bar 58 azamattyń múgedektigi bolmaǵany anyqtaldy. Belgilengen talaptarǵa qaıshy medıtsına qyzmetkerleri olardy medıtsınalyq-áleýmettik saraptamaǵa jibermeı, azamattardyń konstıtýtsııalyq quqyqtarynyń buzylýyna ákep soqty, — delingen habarlamada.

Qazirgi ýaqytta onkologııalyq naýqastardy saraptamaǵa jiberý úshin prokýrorlyq qadaǵalaý aktisi boıynsha materıaldar daıyndalýda.

Vedomstvo málimetinshe, buzýshylyqtar úshin onkologııalyq dıspanserdiń kináli qyzmetkerleri tártiptik jaýapkershilikke tartyldy.

Aıta keteıik, azamattardyń quqyqtaryn saqtaý máseleleri prokýratýranyń turaqty baqylaýynda.

Buǵan deıin prokýratýra Pavlodar psıhonevrologııa ortalyǵynda balalardy kópten beri uryp-soǵyp kelgenin anyqtady.