BQO-da baılanys operatorlaryna salynǵan aıyppul 38 mln teńgeden asty

ORAL. KAZINFORM – Batys Qazaqstan oblysynda 405 aýyl bolsa, sonyń 343-i nemese 85 paıyzy ınternet jelisimen qamtylǵan.

BQO tsıfrlyq tehnologııalar basqarmasynyń basshysy Nurǵısa Qamashevtiń óńirlik kommýnıkatsııalar qyzmeti alańynda ótken brıfıngide málim etkenindeı, 376 eldi mekende (93 paıyz) uıaly baılanys paıdalanýshylar dybystyq qońyraý shala alady.

Nurǵısa Málikulynyń sózine qaraǵanda, bıyl Beeline jáne Kcell baılanys operatorlary Oral, Aqsaı qalalary men 30 eldi mekende jańa bazalyq stantsııalardy ornatýdy kózdegen bolatyn. Kúni búgin 21 stantsııa ornatyldy. 

Oǵan qosa josparlanǵan 225 aýyldyń 202-sinde qoldanystaǵy bazalyq stantsııalaryna 4G standartyna deıin jańartý jumystary júrgizildi.

Jyl sońyna deıin Kcell baılanys operatorymen taǵy úsh eldi meken jańa bazalyq stantsııamen qamtamasyz etilmekshi. 

– Basqarma «Memlekettik radıojıilik qyzmeti» RMK-men birlesip Oral qalasy jáne aýdan ortalyqtarynyń uıaly baılanys qyzmetteriniń sapasyn ólsheý jumystaryn júrgizdi. Baılanys operatorlaryna tekseris qorytyndysy boıynsha taldaý aqparaty joldanyp, keler jylǵa jumys sapasyn jaqsartý jóninde usynys berildi, - dedi N.Qamashev.

Onyń aıtýynsha, bıylǵy 11 aıda óńiraralyq baılanys ınspektsııasy baılanys operatorlary qyzmetiniń sapa kórsetkishterine sáıkestigin tekserý maqsatynda jospardan tys 21 tekserý júrgizdi. Sonyń nátıjesinde baılanys operatorlaryna 38,2 mln teńge kóleminde (sonyń ishinde Beeline – 26,4 mln teńge, Tele2 / Altel – 11,8 mln teńge) ákimshilik aıyppul salyndy. Ótken jyly jospardan tys 35 tekserýden soń 67,6 mln teńge aıyppul salynǵan edi.

Eske sala keteıik, budan buryn BQO-da baılanys operatorlaryna 165 mln teńge aıyppul salynǵanyn jazǵan bolatynbyz.