BQO-da balalardyń jaraqat alýy jıilep ketken

ORAL. QazAqparat – Batys Qazaqstan oblysynda jyl basynan beri 9400 bala túrli jaraqat aldy, dep habarlaıdy QazAqparat tilshisi.

BQO bas shtattan tys balalar travmatolog-ortopedi, oblystyq kópbeıindi balalar aýrýhanasy travmatologııa bóliminiń meńgerýshisi Bolat Álibaevtyń óńirlik kommýnıkatsııalar qyzmeti alańynda ótken brıfıngide málim etkenindeı, ótken jyly osy merzimde 6900 bala jaraqat pýnktine júgingen bolatyn, bıyl bul kórsetkish 15 paıyzǵa ósip otyr.

Onyń aıtýynsha, balalar kóbinese (65 paıyz) kóshede jaraqat alady. Sondaı-aq turmystyq jaraqattar da barshylyq. Sol sekildi mektepte, sport alańdarynda, jol-kólik oqıǵalary kezinde balalar jaraqat alyp jatady. Ásirese, bıikten qulaý, kúıip qalý, ótkir nárselerge kesip alý jıi kezdesedi.

«Mundaı jaraqattardyń aldyn alý úshin balalardy ata-analardyń barynsha kózden tasa qaldyrmaǵany durys. Ásirese, qazirgideı jaz kezinde muqııat bolý kerek», dedi B.Álibaev.

Eske sala keteıik, budan buryn Oralda átkenshekte oınap júrgen 13 jasar balanyń eki saýsaǵynan aıyrylǵanyn, sondaı-aq Oralda balalar alańyndaǵy oqıǵa boıynsha tekserý júrgizilip jatqanyn jazǵan bolatynbyz.

B.Álibaev jaraqat alǵan 13 jasar balaǵa tıisti medıtsınalyq járdem kórsetilip, ambýlatorııalyq em alýǵa jiberilgenin jetkizdi.

Foto: thesun.co.uk