BQO-da balabaqshaǵa kezekke turý avtomatty túrde júzege asyrylýda
Oblystyq bilim basqarmasynyń basshysy Sholpan Qadyrovanyń aıtýynsha, bul - «Tsıfrlyq Qazaqstan» memlekettik baǵdarlamasy aıasynda iske qosylyp jatqan jańa júıeniń biri.
Elbasy bıylǵy Joldaýynda «Biz tsıfrly tehnologııany qoldaný arqyly qurylatyn jańa ındýstrııalardy órkendetýge tıispiz. Bul - mańyzdy keshendi mindet», dep atap kórsetken bolatyn.
Atalmysh baǵdarlama jańa tehnologııalar arqyly halyqtyń ómir súrý sapasyn jaqsartý, ınfraqurylymdy damytý, ekonomıka salasyn tsıfrlandyrý jáne memlekettik qyzmet kórsetý júıesin jetildirýdi kózdeıdi.
Qazirgi tańda Oral qalasynda 2018 jyldyń qańtar aıynan, Bórli aýdanynda tamyzdan balabaqshaǵa elektrondy túrde kezekke turý júıesi jumys jasaýda. Jyl aıaǵyna deıin barlyq aýdan ortalyqtaryndaǵy mektepke deıingi uıymdardy jobaǵa qosý josparlanýda.
Sholpan Maratqyzynyń sózine qaraǵanda, kezekti basqarý júıesi turǵyndarǵa kezekke qoıýǵa ótinish berýge, ony ózgertýge nemese keri qaıtarýǵa, mektepke deıingi uıymǵa joldama alýǵa, basqa da isterdi elektrondy túrde atqarýǵa múmkindik beredi.
Oral qalasy boıynsha kezekke garden.bilim-oral.gov.kz, Bórli aýdany boıynsha ddo.rooaksai.kz portaldarynda nemese halyqqa qyzmet kórsetý ortalyqtaryna kelip turýǵa bolady.
Kezekti basqarý júıesinde tirkelgen ótinishter balanyń ótinishte kórsetilgen týǵan jyly boıynsha túrli kezekke, al kezektiliktiń ishinde ótinishti bergen kúnine qaraı toptastyrylady. Bos oryndarǵa joldamalar berý jas erekshelikterin eskere otyryp júzege asyrylady.
QR Bilim jáne ǵylym mınıstriniń 2015 jylǵy 7 sáýirdegi №172 buıryǵyna ózgerister engizý týraly» buıryǵymen bekitilgen «Mektepke deıingi balalar uıymdaryna jiberý úshin mektepke deıingi (7 jasqa deıin) jastaǵy balalardy kezekke qoıý» memlekettik kórsetiletin qyzmet standartynyń 7-tarmaǵyna sáıkes birinshi kezekte oryn alý quqyǵy kelesi sanattarǵa beriledi:
1) zańdy ókilderi múgedek bolyp tabylatyn balalar;
2) ata-anasynyń qamqorlyǵynsyz qalǵan balalar jáne jetim balalar;
3) kóp balaly otbasylardan shyqqan balalar;
4) erekshe bilim berýdi qajet etetin balalar.
Ótinishterdi kezekke qoıý kelesi talaptar boıynsha júzege asyrady:
- Qazaqstan Respýblıkasy aýmaǵynda eshbir kezekte tirkelmegen ótinish;
- balanyń jasy 7 (jeti) jastan aspaǵan;
- ótinish berýshi balanyń ata-anasy nemese onyń zańdy ókili bolýy.
«Kezekti basqarý júıesine ótinish berý úshin 2 uıaly telefon nómirin jazyp, JSN jáne meken-jaıy týraly málimet jazý qajet, ótinish berýshi 15 mınýttyń ishinde balabaqshaǵa kezekke qoıylady. Bir táýliktiń ishinde ótinish berýshige tirkelgeni týraly SMS habarlama keledi», dedi Sh.Qadyrova.
Aıta keteıik, saıttan tek sábılerdi balabaqshaǵa kezekke qoıyp qana qoımaı, mektepke deıingi uıymdar týraly tolyq málimet alýǵa bolady.
Bıylǵy jyl basynan beri osy joba boıynsha myńnan astam búldirshin balabaqshaǵa ornalastyryldy.