BQO-da balabaqshada búldirshenderdiń jábirlenýine baılanysty qylmystyq is qozǵaldy
ORAL. KAZINFORM — Batys Qazaqstan oblysy Novenkıı aýylyndaǵy «Búldirshin» bóbekjaıynda baldyrǵandardyń tárbıeshiler tarapynan jábir kórgeni belgili boldy.
Ata-analar balalaryn tárbıeshilerdiń uryp-soǵatyny jóninde polıtsııaǵa shaǵym túsirgen.
BQO polıtsııa departamentiniń baspasóz qyzmeti atalǵan derek boıynsha qylmystyq is qozǵalǵanyn málimdedi.
Qazirgi kezde QR QK 140-babyna sáıkes (kámeletke tolmaǵan adamdy tárbıeleý jónindegi mindetterdi oryndamaý) tergeý amaldary júrgizilip jatyr.
Aýyl turǵyndarynyń sózine qaraǵanda, balalar úılerine deneleri kógerip kelgen. Tárbıeshilerdiń dóreki áreketteri beınejazbaǵa da túsken.
BQO bilim basqarmasynyń bólim basshysy Jadyra Bekjanova beınejazbany qaraǵan kezde tárbıeshi men tárbıeshiniń kómekshisi tarapynan dórekilik derekteriniń anyqtalǵanyn aıtty.
— Tárbıeshi men onyń kómekshisi óz erkimen jumystan shyǵaryldy. Sonymen qatar «Búldirshin» bóbekjaıynyń meńgerýshisine aýdandyq bilim berý bóliminiń buıryǵymen sógis jarııalandy, — dedi J.Bekjanova.
Eske sala keteıik, budan buryn BQO-da mektep ǵımaratynda shashtarazdyń ornalasýyna baılanysty bilim basqarmasy jaýap bergenin jazǵan bolatynbyz.