BQO-da aımaqtyq-respýblıkalyq jyrshy-termeshiler baıqaýy ótti
BQO-da daýylpaz aqyn, dańqty tulǵa Mahambet Ótemisulynyń 220 jyldyǵyna arnalǵan «Tartynbaı sóıler asylym...» atty aımaqtyq-respýblıkalyq jyrshy-termeshiler baıqaýy ótti, dep habarlaıdy Kazinform.
Baıqaýdyń bas júldesin qyzylordalyq Nuraıym Ertalap jeńip alyp, 1000 000 teńgeni qanjyǵalady. Jeńimpazdarǵa óńir basshysy Narıman Tóreǵalıevtiń atynan alǵys hattar men aqshalaı syılaryn tabystaǵan BQO ákiminiń orynbasary Baqytjan Narymbetov ulttyq dástúr men salt-sana taǵylymyn jastardyń boıyna darytyp, jas urpaqtyń jan-júıesin oıatýda dástúrli ónerdiń alatyn orny erekshe ekenin, ásirese, ǵıbrattyq máni bar ıdeıalardy terip aıtatyn termeshilik ónerdiń óz bıigi, óz tyńdaýshysy bar ekenin atap ótti.
Qadyr Myrza Áli atyndaǵy oblystyq mádenıet jáne óner ortalyǵynda ótken baıqaýǵa qatysýshylar eki kezeń boıynsha baq synady. Aldymen Mahambet Ótemisulyna arnap jyr-tolǵaý daıyndady. Oǵan qosa tizim boıynsha M.Ótemisulynyń 10 shyǵarmasyn, ıaǵnı «Kún qaıda?», «Áı, Mahambet, joldasym!», «Tarlanym», «Soǵys», «Emenniń túbi – sary bal», «Narynda», «Mahambettiń Baımaǵambet sultanǵa aıtqan sózi», «Adyra qalǵan Narynnyń», «Eńseligim eki eli», «Arǵymaq, seni saqtadym» atty týyndylaryn jatqa bilýi qajet. Jerebe boıynsha osy shyǵarmalardyń bireýin oryndady. Ekinshi kezeńde úmitkerler óz qalaýy boıynsha Jıembet Bartoǵashuly, Shernııaz Jarylǵasuly, Marabaı Quljabaıuly, Kerderi Ábýbákir, Sartaı Kóshkinshiuly, Qumar Ábýǵalıulynyń bir shyǵarmasyn tańdady. Sonymen qatar Yǵylman Shórekulynyń «Isataı-Mahambet» dastanynan 20-30 mınýttyq úzindi oryndady.
«Halqymyzdyń ótken tarıhynda tańdy tańǵa uryp, tyńdarmanyn uıytyp tyńdatyp, qulaq quryshyn qandyrǵan termeshiler kóp bolǵan. Sondyqtan qazaq halqy sózdiń marjany men oıdyń tunyǵynan taǵylym tartyp, jurtshylyqty adaldyq pen ádildikke, tazalyq pen ımandylyqqa tárbıeleıtin termeni «tekti sózdiń tóresi» dep baǵalaǵan. Ónerdiń bul janry qazaq halyq poezııasynda belgili bir júıege túsip qalyptasqan ári ózindik tyńdarmany bar óleń túri bolyp sanalady. Aqıqattyń aldaspanyna aınalǵan ot tildi, oraq aýyzdy aqynnyń murasyn nasıhattaý – basty mindetimiz. Jas urpaq Mahambettiń jaýyngerlik rýhtaǵy jyrlaryn jatqa biledi. Batyrdyń 220 jyldyǵyn atap ótýge Qadyr Myrza Álı atyndaǵy oblystyq mádenıet jáne óner ortalyǵy tyńǵylyqty daıyndaldy. Oblystyq mádenıet, tilderdi damytý jáne arhıv isi basqarmasynyń qoldaýymen jyrshy-termeshiler baıqaýy uıymdastyryldy. Dańqty tulǵanyń jyrlarymen kúıleri áli de zertteýdi qajet etedi. Onyń árbir ól-ńinde qazaqtyń qaısar minezi bar. «Temirqazyq jastanbaı, Qý tolaǵaı bastanbaı, Erlerdiń isi biter me?» dep jyrlaǵan marǵasqa Mahambettiń jaryqqa shyqpaǵan týyndylary da kezdesedi. Sondaı shyǵarmalar kórermenge usynylýy tıis dep esepteımin. Qolyna dombyra alyp, baba dástúrin jalǵastyrýǵa nıet qylǵan talantty jastar jeterlik», – deıdi Qadyr Myrza Áli atyndaǵy oblystyq mádenıet jáne óner ortalyǵynyń dırektory Serik Toqmambetov.
Jyrshy-termeshi, QR Mádenıet salasynyń úzdigi Farhat Orazov baıqaý jyrshy-termeshilerge qoldaý kórsetý, kópshilikke rýhanı azyq syılaý ádebı tildi damytý maqsatynda ótkizilgenin jetkizdi. Onyń aıtýynsha, baıqaýda Qyzylorda, Mańǵystaý, Atyraý, Aqtóbe oblystarynan 20-40 jas aralyǵyndaǵy úmitkerler baq synaǵan. Buǵan deıin respýblıkalyq baıqaýlardan bas júlde, oryn alǵan jyrshy-termeshiler atalǵan baıqaýda synǵa túse almady.
Jyr baıqaýyna óleń-sózdiń qadirin biletin bilikti mamandar qazylyq etti. Atap aıtqanda, úmitkerlerdiń shyǵarmashylyǵyn Aqjaıyq óńiriniń qurmetti qonaǵy, syr súleıleriniń sarqyty, Qazaqstannyń eńbek sińirgen qaıratkeri, jyraý Uljan Baıbosynova, Qazaqstannyń eńbek sińirgen qaıratkeri, «Parasat» ordeniniń ıegeri, dástúrli ánshi, jyrshy-termeshi Berdiǵalıev, fılologııa ǵylymdarynyń doktory, professor Murat Sabyr, halyqaralyq, respýblıkalyq jyrshy-termeshiler konkýrstarynyń laýreaty Farhat Orazov, Batys Qazaqstan oblystyq mádenıet, tilderdi damytý jáne arhıv isi basqarmasy basshysynyń orynbasary Qýanyshbek Muhanǵalıev baǵalady. Qazylar alqasy shyǵarmanyń tereńdigine, máni men mazmunyna, daýys maqamy men oryndalý sheberligine, til tazalyǵy men sahna mádenıetine basa nazar aýdardy. Nátıjesinde, qyzylordalyq Nuraıym Ertalap bas júldege (1000 000 teńge) laıyqty dep tanyldy. Júldeli birinshi oryndy (800 000 teńge) aqtóbelik Baqyt Arystanǵalıeva ıelense, ekinshi orynmen (700 000 teńge) jerlesimiz Sátjan Ǵalymjanov marapattaldy. Al úshinshi oryn (500 000 teńge) qyzylordalyq Uldana Nurtýǵanǵa berildi. Mahambet Ótemisuly atyndaǵy arnaıy júlde (220 000 myń teńge) Mańǵystaý oblysynan kelgen Aısultan Esenǵalıevke buıyrdy. Isataı Taımanuly atyndaǵy arnaıy júlde (220 myń teńge) atyraýlyq Amanjol Daýylbaevqa, kásipker Ermek Málikulynyń arnaıy júldesi (200 000 myń teńge) oraldyq Temirlan Ákimjanovqa berildi.
Bul kúni óleń-jyrǵa shólirkegen halyqtyń aıyzy qanyp, rýhanı qazynaǵa keneldi. Mine, osynaý ıgi isti Qadyr Myrza Áli atyndaǵy oblystyq mádenıet jáne óner ortalyǵy qolǵa alyp, tól ónerdi taǵy da tórge ozdyrdy.
