BQO-da aýyl turǵynynan sibir jarasy anyqtaldy
ORAL. KAZINFORM — Batys Qazaqstan oblysy Kaztalov aýdanynda turǵynnyń sibir jarasyna shaldyqqany tirkeldi.
BQO sanıtarııalyq-epıdemıologııalyq baqylaý departamentinen málim etkenindeı, epıdemıologııalyq tergeý barysynda naýqastyń iri qara maldy soıýǵa qatysqany anyqtaldy.
Veterınarııalyq qyzmetkerlermen birlesip sanıtarııalyq-epıdemııaǵa qarsy is-sharalar tolyq kólemde júrgizildi, epızootııalyq oshaqta dezınfektsııalyq is-sharalar atqarylyp, oshaq oqshaýlandy.
«Búgingi tańda naýqastyń jaǵdaıy qanaǵattanarlyq, dıagnostıka jáne emdeý hattamasyna sáıkes em alýda. Barlyq qarym-qatynasta bolǵan adamdar kúndelikti medıtsınalyq qyzmetkerdiń baqylaýynda boldy. Qazirgi kezde sibir jarasynyń jańa derekteri tirkelgen joq», dep habarlady vedomstvodan.
Departamenttiń eske salýynsha, sibir jarasy – óte qaýipti juqpaly aýrý, kóbinese teriniń karbýnkýl túrinde zaqymdanýymen sıpattalady, qyzba, ıntoksıkatsııamen birge júredi. Adam sibir jarasyn tek aýrý janýarlardan juqtyrady. Óıtkeni naýqas adam aınalasyndaǵylar úshin qaýipti emes. Sibir jarasynyń qozdyrǵyshy adam aǵzasyna eń kishkentaı jaralar, teridegi syzattar, tynys alý joldary jáne aýrý juqtyrǵan, jetkiliksiz pisirilgen et arqyly enýi múmkin.
Sondyqtan turǵyndar mynadaı saqtyq sharalaryn umytpaǵan durys:
- úı janýarlaryna kútim jasaý kezinde jeke qorǵanys kıimderin qoldaný;
- janýarlardy soıýdy aldyn ala veterınarııalyq tekserýden keıin ǵana júrgizý;
- úı janýarlaryna sibir jarasyna qarsy profılaktıkalyq vaktsınatsııa júrgizý;
- belgisiz adamdardan et, sút ónimderin satyp almaý.
Sondaı-aq et óńdeý kásiporyndarynyń, soıý pýnktteriniń qyzmetkerleri, janýarlardy soıýmen, onyń ónimi men shıkizatyn jınaýmen, saqtaýmen, tasymaldaýmen jáne bastapqy óńdeýmen aınalysatyn adamdar sibir jarasyna qarsy profılaktıkalyq ekpemen qamtylýy kerek.
Eske sala keteıik, budan buryn Batys Qazaqstanda 21 myńnan astam adamnyń JRVI-men syrqattanǵanyn jazǵan bolatynbyz.
