Joldy bastady da tastady: BQO-da aýyl turǵyndary dabyl qaqty

ORAL. KAZINFORM – Batys Qazaqstan oblysy Báıterek aýdany Peremetnyı – Polıvnoı – Qarajar baǵytynda jol qurylysynyń toqtap qalǵany jóninde áleýmettik jelide beınejazba tarady.

Osyǵan baılanysty Kazinform tilshisi Polıvnoı jáne Qarajar aýylynyń turǵyndaryna habarlasyp, máseleni bilgen edi.

Olardyń sózine qaraǵanda, merdiger mekeme bıyl kóktemde qum-qıyrshyq tas qospasyn tasyp, isti bastaǵan. Alaıda jumys shilde aıynda toqtap qalǵan. Sodan beri tym-tyrys.

– Qazirgi kezde dala jolymen júrip jatyrmyz. Alda jańbyr jaýǵan mezgilde jol ezilip, eki ortada qatynas bolmaı qalady. Avtobýs kelmeı, balalar sabaqqa bara almaıdy. Salynyp jatqan jolmen júrý múmkin emes. Óıtkeni qıyrshyq tas ótkir, avtokólik dóńgelegin tesip ketedi. Ákimdik osy máselege oraı durys jaýap bermeıdi. Endi jolsyz qalamyz ba dep qorqyp otyrmyz, - deıdi turǵyndar. 

Báıterek aýdany ákimdiginen alynǵan málimet boıynsha Qarajar, sondaı-aq Polıvnoı aýylyna 7,3 kılometr kireberis joldy kúrdeli jóndeý kózdelgen. Inerttik materıal da tolyqtaı jetkizilgen. 

– Qazirgi tańda qarjy bólinbegen. Soǵan qaramastan, merdiger uıym «Anýsh qurylys» JShS joldyń negizin jasaý jumystaryn qolǵa aldy. Kúni búgin qarjylandyrý úshin bıýdjettik ótinim qaıtadan joldandy, - delingen resmı jaýapta. 

Bıyl kóktemde Peremetnyı men Qarajar aýyly arasyndaǵy joldyń ezilip ketkeni jóninde turǵyndar áleýmettik jelide jazǵan edi. Áıtse de másele sheshilmeı, qara kúzge deıin sozylyp otyr. 

Eske sala keteıik, budan buryn BQO-da aýylmen jol qatynasy qıyndap ketýine baılanysty ákimdik jaýap bergenin jazǵan edik.