BQO-da aýyl turǵyndary bir apta boıy sý joqtyǵyn aıtyp shaǵymdandy
ORAL. KAZINFORM — Batys Qazaqstan oblysy Aqjaıyq aýdany Quraılysaı aýyldyq okrýgindegi Juban jáne Saıqudyq aýyldaryn sýmen qamtýda irkilister týyndady.
Aýyl turǵyndarynyń Instagram áleýmettik jelisinde málim etkenindeı, atalǵan eki eldi mekende bir apta boıy aýyz sý bolmaǵan.
— Jaman degen jerde uńǵymadan sý shyǵarý úshin amaldar jasalǵanymen, eshqandaı nátıje bolmaı tur. Turǵyndarǵa sý tasylyp berilýde, biraq bul jetkiliksiz. Maldy qalaı sýarmaqpyz? — deıdi turǵyndar.
Turǵyndardyń endi biriniń sózine qaraǵanda, sý esepsiz jumsalady. Adamdar aýyz sýmen malyn sýarady. Mal sýarý úshin jer asty qudyǵy, Óleńti ózeniniń az bolsa da sýy bar. Eger qudyq kózi arshylmasa, aldaǵy ýaqytta eki aýyl da sýdan zardap shegýi múmkin. Jamannyń basyndaǵy elektr jelileri de eskirgen. 2015 jylǵa deıin Saıqudyq eldi mekeniniń turǵyndary sýdy Juban aýylynan tasyp ishken.
Osy máselege oraı Kazinform tilshisi Aqjaıyq aýdany ákimdigine arnaıy saýal joldaǵan edi.
Ákimdik málimetine qaraǵanda, qazirgi ýaqytta uńǵymalardy qaıta qalpyna keltirý jumystary júrgizilýde.
Munaraǵa qosylǵan uńǵymalardyń biri tazalanyp, aýyz sý jınaqtalýda. Ekinshi uńǵymany qosý úshin barlyq qajetti materıaldar jetkizildi. Uńǵymany qaıta iske qosý boıynsha qajetti jumystar atqarylýda.
— Kúni búgin rezervýardaǵy sý deńgeıine baılanysty aýyz sý keste boıynsha beriledi. Sondaı-aq osy jumys túrlerin atqarý kezinde halyq úshin aýyz sý tasymaldaý uıymdastyryldy. Ekinshi uńǵymany tazartyp, iske qosqannan keıin sý qalypty rejımde beriletin bolady, — delingen resmı jaýapta.
Aýdan ákimi Murat Serdalın barlyq mamannyń uńǵymanyń basynda birneshe kúnnen beri jumystanyp jatqanyn jetkizdi.
— Eshkim de sýsyz qalmaıdy. Halyqqa sýdy tasyp ta berip jatyrmyz. Oral qalasynan «Batys sý arnasy» JShS-nyń mamandary shaqyrtyldy. Uńǵymalardyń paıdalanýǵa berilgenine biraz ýaqyt ótken, sýdyń deńgeıi túskennen keıin shyǵýy azaıǵan. Endi sony iske qosý úshin barlyq kúsh jumyldyrylatyn bolady, — dedi M.Serdalın.
Eske sala keteıik, budan buryn Oralda qubyrda apat bolyp, úıler men saýda nysandary sýsyz qalǵanyn jazǵan edik.