BQO-da aýyl balalary tozyǵy jetken mektepte bilim alyp júr

ORAL. KAZINFORM — Aqjaıyq aýdany Taıpaq aýylynda Qurman Baısyqov atyndaǵy jalpy orta bilim beretin mekteptiń tozyǵy jetip tur.

Qoǵam belsendisi Almagúl Iqsanovanyń áleýmettik jelide málim etkenindeı, keńes dáýirinen qalǵan eski ǵımaratta aýyl balalary oqyp júr. Beınejazbadan kórinip turǵandaı, mektep qabyrǵalarynyń sylaqtary túsip qalǵan.

- Kirpish te qaýipti, oqýshylardyń basyna qulap ketýi múmkin. Esiktiń tutqasy bylqyldap tur, balalar saýsaǵyn qystyryp alsa, qaıtemiz. Mektep aýlasynda syranyń bótelkeleri shashylyp jatyr. Shuńqyrǵa bireý qulaýy yqtımal. Ájethanalardyń jaǵdaıy máz emes. Bastaýysh synyp oqýshylary ishtegi ájethanaǵa, al joǵary synyptaǵylar syrtqa barady eken. Balalar qaýipsizdigin kim oılaıdy? – deıdi A.Iqsanova.

Burynǵy aýdan ortalyǵy Taıpaq aýylynyń turǵyny Bolat Doshaev atalǵan mekteptiń tarıhy mol bilim ordasy ekendigin jetkizdi.

- Ótken ǵasyrda shirkeý ǵımaratyn buzyp, sonyń kirpishinen, eski úılerdiń taqtaılarynan salynǵan ǵımarat. Qazirgi jaǵdaıy syn kótermeıdi. Jańa mektep qajet, - dedi B.Doshaev.

Osy máselege oraı Kazinform tilshisi oblystyq bilim basqarmasyna arnaıy saýal joldady.

Basqarmadan túsken málimetke qaraǵanda, bilim berý mekemesiniń negizi 1948 jyly qalanyp, 1953 jyly paıdalanýǵa berilgen. 2024 jyly jylý júıesi jańartylsa, 2025 jyly bloktyq-modýldik qazandyq ornatylyp, aǵymdaǵy jóndeý júrgizilgen.

- Mektepke kúrdeli jóndeý jumystaryn júrgizý 2026 jylǵa josparlanyp otyr. Bilim basqarmasy jaǵdaıdy baqylaýda ustap, mektepter jaǵdaıyn jaqsartý boıynsha sharalardy kezeń-kezeńmen júzege asyryp jatyr. Q.Baısyqov atyndaǵy mektepte 2025-2026 oqý jylynda 1-11 synypta 497 oqýshy bilim alyp jatyr. Sondaı-aq mektepaldy daıarlyq tobynda 46 tárbıelenýshi bar. 69 pedagog jumys isteıdi, - delingen resmı jaýapta.

Eske sala keteıik, budan buryn BQO-da jańadan salynǵan mektep ǵımaraty eki jyl ótpeı nelikten jabylǵanyn jazǵan edik.