BQO-da áskerı qyzmetshi úıinen aıyrylyp qala jazdady
ORAL. KAZINFORM — Batys Qazaqstan oblysy Jánibek aýdandyq sotynda turǵyn úıden májbúrli túrde shyǵarý týraly azamattyq is qaralyp, núkte qoıyldy.
BQO sotynyń baspasóz qyzmetinen málim etkenindeı, aýdandyq turǵyn úı-kommýnaldyq sharýashylyq, jolaýshy kóligi jáne avtomobıl joldary bólimi mekemesi páterdi tekserý boıynsha birneshe ret reıd jasap, páter ıesiniń onda turmaıtynyn anyqtap, basqa baspana berilmesten, turǵyn úıden májbúrli túrde shyǵarý týraly talapty qanaǵattandyrýdy surady.
Alaıda, sot otyrysynda anyqtalǵandaı, jaýapker 2024 jyldan bastap Abaı oblysyndaǵy 10810-áskerı bóliminde barlaý rotasynyń vzvodynda avıakózdeýshi retinde qyzmet etedi.
Áskerı qyzmetshi turǵyn úı boıynsha berejaǵy joq ekenin, kommýnaldyq qyzmetter úshin qaryz ótelip, turǵyn úıdi paıdalanǵany úshin tólem tólengenin aıtyp, sottan talap aryzdy qanaǵattandyrýsyz qaldyrýdy surady.
Sot is materıaldaryn zerdeleı kele, jaýapkerdiń aktilerde kórsetilgen merzimde turǵylyqty jeri boıynsha kelmeýi ony úıinen shyǵarýǵa negiz bola almaıdy degen qorytyndyǵa keldi.
Talap qoıýshy usynǵan dáleldemelerge sáıkes, 2024 jylǵy aqpan, mamyr, shilde, tamyz aılarynda jalǵa alynǵan úıde jaýapkerdiń bolmaýy týraly aktiler jasalǵan.
Jaýapkerdiń túsiniktemelerinen onyń 2024 jyldan bastap Abaı oblysynda jumys jasaıtyny belgili boldy, bul derek aýdandyq qorǵanys isteri jónindegi bólim bastyǵynyń buıryǵymen rastalady.
— Zań talaptaryna sáıkes adam Qazaqstan Respýblıkasynyń Qarýly Kúshterinde ne Qazaqstan Respýblıkasynyń qatysýymen odan tys jerlerde qurylǵan qarýly kúshter quramynda áskerı qyzmetten ótkende, qyzmet merzim ishinde jáne eńbek sharty boıynsha nemese saılanbaly qyzmetke saılanýyna baılanysty jumysqa ketkende, búkil jumys istegen ýaqyty ishinde páteri saqtalady. Osylaısha, jaýapkerdi memlekettik turǵyn úıden shyǵarýdyń zańdy negizderiniń bolmaýyna baılanysty talap aryz qanaǵattandyrýsyz qaldyryldy. Sheshim zańdy kúshine endi, — dep habarlady vedomstvodan.
Eske sala keteıik, budan buryn oraldyq turǵyndardyń týrıstik fırmadan 5 mln teńge óndirip alǵanyn jazǵan bolatynbyz.