BQO-da áleýmettik jelide bılik ókilin qorqytyp, balaǵattaǵan turǵyn sottaldy
ORAL. KAZINFORM — Shyńǵyrlaý aýdandyq sotynda QR QK 378-baby 2-bóligi jáne 380-baby 2-bóligi 4-tarmaǵyna sáıkes aıyptalǵan K. esimdi turǵynǵa qatysty úkim shyqty.
BQO sotynyń baspasóz qyzmetinen málim etkenindeı, atalǵan azamattyń 1 jyl 6 aıǵa bas bostandyǵy shekteldi.
Іs materıaldarynan belgili bolǵanyndaı, K. bıylǵy 15 sáýirde búrkenshik atpen Facebook áleýmettik jelisindegi paraqshasynda post jarııalap, laýazymdy qyzmetkerdi óltiremin, densaýlyǵyna zııan keltiremin dep qorqytyp, qorlaǵan. Post bılik ókiliniń óziniń qyzmettik mindetterin oryndaýyna baılanysty jazylǵan.
Sot psıhologııalyq-fılologııalyq saraptamasynyń qorytyndysyna sáıkes sottalýshynyń málimdemeleri jábirlenýshiniń ar-namysy men qadir-qasıetine qatysty qorlaý bolyp esepteledi. Sottalýshynyń málimdemesinde orys tilindegi balaǵat sózder jáne jábirlenýshige qaýip tóndiretin belgiler bar.
- Sot otyrysynda sottalýshy kinásin moıyndap, istegen is-áreketine ókinetinin aıtty. Sot úkim shyǵarǵan kezde onyń kámeletke tolmaǵan balalary bar ekenin, jaýaptylyqty aýyrlatatyn mán-jaıdyń joqtyǵyn eskerdi. 1 jyl 6 aıǵa bas bostandyǵy shektelgen turǵyn probatsııalyq baqylaýda bolyp, osy merzimde jyl saıyn 100 saǵat kóleminde qoǵamdyq jumystarǵa tartylady. Sonymen qatar jábirlenýshilerge ótemaqy qoryna 58 980 teńge (15 AEK) mólsherinde májbúrli tólem óndirildi. Úkim zańdy kúshine endi, - dep habarlady vedomstvodan.
Eske sala keteıik, BQO-da aýyldasyna oq atyp, jaraqat keltirgen eki turǵynnyń sottalǵanyn jazǵan bolatynbyz.