BQO-da 9 jastaǵy bala eki inisin órtten qutqardy
ASTANA. KAZINFORM - Oqıǵa Batys Qazaqstan oblysy Syrym aýdany Araltóbe aýyldyq okrýginde boldy.
Mektepte isteıtin ata-anasy jumysqa ketkende, úsh bala úıde bolǵan. Olar teledıdar kórip otyrǵanda, kenet jaryq sónedi. Sóıtse, jatyn bólmeden órt shyǵyp, tútindeı bastapty. Batyr balanyń ákesi Fazyl Tilekbergenuly mán-jaıdy tolyq túsindirip berdi.
– Byltyr Jympıtyda 5 balanyń órtenip ketý oqıǵasy balam Beıbarystyń lezde esine túsken. Shaqalaq inisin bir qolyna kóterip, eki jastaǵy baýyryn ekinshi qolyna jetektep, syrtqa alyp shyqqan. Sóıtip, anasyna habarlasyp, úıdiń órtenip jatqanyn habarlaǵan. Bárimiz jalma-jan júgirip bardyq. Aýyl ákimine, órt sóndirýshilerge habarlastyq, – deıdi ol.
Sondaı-aq onyń sózinshe, qyzyl jalyn jatyn bólmeniń syrtyna ornatylǵan esepteýish symdarynyń tuıyqtalýynan tutanǵan.
– Syrym aýdany, Araltóbe aýylyndaǵy úılerdiń birinde jatyn bólmede jıhazdar men jeke zattar janǵan. Órttiń aýmaǵy – 5 sharshy metr. TJD qyzmetkerleri órtti tolyqtaı sóndirdi. Zardap shekkender men qaza bolǵandar joq, – delingen BQO TJD-nyń resmı jaýabynda.
Batyr bala Beıbarysty aýyldyq okrýgtiń ákimi qabyldap, qurmet bildirgen.
Aıta keteıik, buǵan deıin Petropavlda kólik júrgizýshisi órttiń dúkenge taralýyna jol bermegenin jazǵanbyz.