BQO-da 600-den astam qyz bala adam papıllomasy vırýsyna qarsy egildi

ORAL. KAZINFORM – Batys Qazaqstan oblysynda QR bas memlekettik sanıtarııalyq dárigeriniń «Adam papıllomasy vırýsyna qarsy vaktsınasyn uıymdastyrý jáne júrgizý týraly» № 11 qaýlysyna sáıkes qyrkúıek aıynan bastap 11 jastaǵy qyzdarǵa vaktsınatsııa júrgizilýde.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonymen qatar vaktsınatsııadan ótpegen 12, 13 jastaǵy qyzdarǵa da osyndaı ekpe jasalady.

Nurlybek Ermekulynyń sózine qaraǵanda, QR Úkimetiniń 2020 jylǵy 24 qyrkúıektegi № 612 qaýlysyna sáıkes jatyr moıny obyrynyń negizgi qozdyrǵyshy – adam papıllomasy vırýsyna qarsy vaktsınatsııa elimizdiń ulttyq ekpeler kúntizbesine engizildi.

«Kúni búginge deıin oblys boıynsha 11, 12 jáne 13 jasqa tolǵan 634 qyz ekpe aldy. Óńirde 11 jastaǵy 5 myńǵa jýyq qyz bala tirkelgen. Osyǵan oraı oblysqa 5 500 doza jetkizildi. Jatyr moıny qaterli isiginiń aldyn alý úshin vaktsına alý qajet. Sondyqtan bul rette ata-analardyń durys sheshim qabyldaǵany mańyzdy», deıdi N.Mustaev.

Onyń aıtýynsha, juqpaly ınfektsııalar boıynsha jaǵdaı únemi baqylaýda.

«Bıylǵy toǵyz aıda óńirde 1 235 adamnyń qyzylsha aýrýyna shaldyqqany tirkeldi. Tamyz aıynan bastap bul dertpen syrqattanýshylyq deńgeıi tómendep keledi, aptasyna 2-3 adam aýyrýda. Qyzylsha boıynsha epıdemıologııalyq ahýaldy turaqtandyrý úshin 1 jastaǵylarǵa vaktsınatsııa, 6 jastaǵylarǵa revaktsınatsııa jáne qosymsha jappaı ımmýndaý júrgizilýde. Oblysta kókjótel boıynsha jaǵdaı turaqsyz kúıinde qalyp otyr. Toǵyz aıda 38 adam kókjótelmen syrqattansa, sonyń 37-si nemese 97 paıyzy – 14 jasqa deıingiler. Jalpy aýyrǵandardyń 35-i nemese 92-si ekpe almaǵan. Osy ýaqytqa deıin túrli sebeptermen ýaqytynda egilmegen 1 723 balaǵa ekpe jasaldy», dedi N.Mustaev.

Eske sala keteıik, budan buryn Batys Qazaqstanda jatyr moıny obyrynan ólim kórsetkishi 33,3 paıyzǵa ósip otyrǵanyn jazǵan bolatynbyz.