BQO-da 60-tan astam iri qarany qoldy qylǵan qylmystyq top quryqtaldy
Batys Qazaqstan oblysynda 60-tan astam iri qarany jymqyrǵan qylmystyq top quryqtaldy, dep habarlaıdy Kazinform.
BQO polıtsııa departamentiniń baspasóz qyzmetinen málim etkenindeı, oqıǵa Terekti aýdany aýmaǵynda boldy.
Jedel izdestirý is-sharalary barysynda anyqtalǵanyndaı, úsh adamnan turǵan qylmystyq top ótken jylǵy qazan jáne qarasha aılarynda erkin jaıylystan Terekti aýdanynyń turǵyndaryna tıisili iri qara maldaryn urlap ketken.
«Barymtashylar 62 bas iri qarany jymqyrsa, sonyń 8-i kúdiktilerdiń qoralarynan tabyldy. Ustalǵan azamattardyń birine tıesili «Toyota Hilux» avtokóligi, sondaı-aq kúdiktiler urlanǵan iri qara malǵa aıyrbastap alǵan «Ford» avtokóligi tárkilendi. Sonymen qatar qoldy bolǵan maldy bazardaǵydan tómen baǵamen satyp alyp júrgen mal satýshy anyqtaldy. Qolǵa túskender ýaqytsha ustaý ızolıatoryna qamaýǵa alyndy. Kúdiktilerdiń osyǵan uqsas qylmystarǵa qatysynyń bar-joǵy anyqtalýda. Qazirgi kezde QR QK 188-1-baby (mal urlyǵy) boıynsha sotqa deıingi tergeý amaldary júrgizilýde», dep habarlady vedomstvodan.
