BQO-da 400-den asa kıik múıizin alyp bara jatqan brakonerler ustaldy

NUR-SULTAN. QazAqparat – Batys Qazaqstanda «Kıik» jedel izdestirý sharasy kezinde tabıǵat ınspektorlary eki kólikke mingen brakonerlerdi ustady, dep habarlaıdy QazAqparat tilshisi.

«2020 jyldyń 18 mamyrynda arnaıy «Kıik» jedel izdestirý sharasy barysynda kıik aýlap, derıvattardyń zańsyz aınalymymen aınalysqan Batys Qazaqstannyń tórt azamaty ustaldy. Operatsııa kezinde reseılik «Nıssan», «Nıva Shevrole» kólikterinen kıiktiń 434 múıizi, mototsıkl, 5 qarý (ishinde optıkamen kózdep atatyny da bar), ártúrli kalıbrli 293 patron, túnde kóre alatyn qurylǵy, radıstantsııalar, GPS navıgator, 7 mobıldi telefon men 2 planshet, ara men pyshaq, taǵy basqa zattar tabyldy», - dep jazady Sáken Dildahmet.

Atalmysh fakt boıynsha QR Qylmystyq kodeksiniń 339-baby boıynsha sotqa deıingi tergeý amaldary júrgizilip jatyr.

Aıta keterligi, 15 sáýirden bastap Qazaqstanda brakonerlikke qarsy «Kıik» atty keń aýqymdy aktsııa júrgizilip jatyr.