BQO-da 24 mektep órt qaýipsizdigi erejesin buzǵan
ORAL. KAZINFORM — Batys Qazaqstan oblysynda órt qaýipsizdigi erejesin buzǵan 24 mektep jaýapkershilikke tartyldy.
BQO prokýratýrasynyń baspasóz qyzmetinen málim etkendeı, Bórli aýdany prokýratýrasy bilim berý mekemelerinde balalardyń qaýipsizdigin saqtaý boıynsha tekserý júrgizgen.
Anyqtalǵandaı, mektepterde órt qaýipsizdigi erejesin saqtaý qamtamasyz etilmegen.
Atap aıtqanda, jertólelerde janǵysh zattar men materıaldar saqtalǵan. Órt bola qalǵan jaǵdaıda ony sóndirý úshin sýmen jabdyqtaý kózderi joq.
«Órt qaýipsizdigi sharalary boıynsha nusqaýlyqtar bekitilmegen, órt dabyly jumys istemeıdi. Buzýshylyqtarǵa qaramastan, mektep dırektorlary olardy joıý sharalaryn qabyldamaı, oqý úderisin jalǵastyra bergen. Prokýrorlyq qadaǵalaý aktisi boıynsha 24 jalpy bilim beretin mektep Ákimshilik quqyqbuzýshylyq kodeksi 410-baby 1-bóligine (órt qaýipsizdigi talaptaryn buzý) sáıkes ákimshilik jaýapkershilikke tartyldy» dep habarlady vedomstvodan.
