BQO-da 16 myńnan astam abonent elektr jaryǵynsyz qaldy

ORAL. KAZINFORM – Batys Qazaqstan oblysynda qolaısyz aýa raıyna baılanysty úzilgen elektr jelilerin qalpyna keltirý jumystary júrgizilip jatyr. 

BQO energetıka, turǵyn úı-kommýnaldyq sharýashylyq basqarmasynan málim etkenindeı, oblystyń 5 aýdanynda 63 eldi mekende elektr jelilerine zaqym kelgen. Atap aıtqanda, Jánibek aýdanynda 12, Bókeı ordasynda 18, Tasqalada 8, Kaztalovta 16, Báıterektegi 9 aýylda jáne Oralda elektr jaryǵy sóndi. 

Búgingi 15.00-degi málimet boıynsha 16 myńnan astam abonent jaryqsyz qalǵan. Gazben qamtý jelileri boıynsha jaǵdaı turaqty, ajyratý bolǵan joq. 

Qazirgi tańda Oral qalasynda Zachagan kentinde jaryq joq. Turǵyndar osyǵan alańdaýshylyq bildirip otyr. 

Eske sala keteıik, budan buryn BQO-da boranǵa baılanysty birqatar aýdanda elektr jaryǵy óshkenin jazǵan edik.