BQO-da 132 mln teńge tarıfterdi tómendetý tetigi arqyly tutynýshylarǵa qaıtarylady
ORAL. KAZINFORM – Batys Qazaqstan oblysynda 37 tabıǵı monopolııa kásipornynyń jumysy 47 qyzmet túri boıynsha retteledi.
QR Ulttyq ekonomıka mınıstrligi Tabıǵı monopolııalardy retteý komıteti BQO boıynsha departamentiniń basshysy Gúljaz Qazbekovanyń óńirlik kommýnıkatsııalar qyzmeti alańynda ótken brıfıngide málim etkenindeı, olardyń qatarynda elektrmen, jylýmen, sýmen jabdyqtaý, sý burý, gaz tasymaldaý jáne kirme jol qyzmetteri salalarynda jumys isteıtin uıymdar bar.
Gúljaz Jánibekqyzynyń sózine qaraǵanda, sonymen qatar departament qoǵamdyq mańyzy bar naryqtyń eki sýbektisiniń baǵa belgileý tártibiniń saqtalýyn baqylaýda ustaıdy.
Segiz kásiporyn bes jyldyq uzaq merzimdi tarıfter boıynsha jumys isteıdi jáne jalpy somasy 20,6 mlrd teńgeden astam ınvestıtsııalyq baǵdarlamalardy júzege asyryp jatyr. Bul qarajat kommýnaldyq ınfraqurylymdy jańǵyrtý men jańartýǵa baǵyttalǵan. Qalǵan 29 kásiporyn qýaty az sýbektiler sanatyna engen.
Departament basshysynyń aıtýynsha, 2025 jyldyń qorytyndysy boıynsha departament 2024 jylǵa arnalǵan tarıftik smetalar men ınvestıtsııalyq baǵdarlamalardyń oryndalýy týraly 69 esepti qarady. Qoldanystaǵy zańnamaǵa sáıkes kásiporyndar bekitilgen is-sharalardy tolyq oryndaýǵa jáne tarıfte kózdelgen qarajatty maqsatty túrde paıdalanýǵa mindetti.
– Taldaý nátıjesinde 15 sýbektiniń qyzmetinde buzýshylyqtar anyqtaldy. Osyǵan baılanysty QR Ulttyq bankiniń qaıta qarjylandyrý mólsherlemesin eskere otyryp, jalpy somasy 132,23 mln teńgege ýaqytsha ótemdik tarıfter engizildi. Bul qarajat tarıfterdi tómendetý tetigi arqyly tutynýshylarǵa qaıtarylady. Buzýshylyqtar jylýmen, sýmen jabdyqtaý, sý burý jáne kirme jol qyzmetteri salalarynda tirkeldi, - dedi G.Qazbekova.
Departament málimeti boıynsha jyl basynan beri túsken 30 ótinimniń 23-i bekitildi. Jeteýi ótinish berýshilerdiń ózderi tarapynan keri qaıtaryldy. Sondaı-aq ınvestıtsııalyq baǵdarlamalardy bekitý jáne túzetý boıynsha 22 ótinim qaralyp, 18-i bekitildi, bireýi boıynsha bas tartyldy, úsheýi keri qaıtaryldy.
Jylýmen jabdyqtaý qyzmetteriniń qunyn qaıta esepteý máselesine erekshe nazar aýdarylady. 2024-2025 jyldardaǵy jylytý maýsymynyń qorytyndysy boıynsha «Jaıyqjylýqýat» AQ tarapynan jylý jetkizbeý faktisi anyqtaldy. Jylý eseptegish quraldary joq tutynýshylarǵa qaıtarylatyn qarajattyń jalpy somasy – 3 mln 403 myń 037,22 teńge. Qaıtarym esepteýlerdi túzetý arqyly júrgiziledi.
– 2025 jyly sotta qaralǵan úsh istiń ekeýi boıynsha sheshimder departamenttiń paıdasyna shyǵaryldy. Tarıftik zańnamany jáne ınvestıtsııalyq mindettemelerdi buzǵany úshin oblys kásiporyndaryna jalpy somasy 19 mln teńge aıyppul salyndy, - dep qosty G. Qazbekova.
Eske sala keteıik, budan buryn BQO-da jer berýde zańnamany buzǵan ákimdik qyzmetkerlerine aıyppul salynǵanyn jazǵan edik.
Sondaı-aq sot uıǵarymyn oryndamaǵan BQO bilim basqarmasynyń basshysy aıyppul tóledi.