BQO-da 114 mlrd teńgege 579 shaqyrym jol salynbaq
ORAL. KAZINFORM – Batys Qazaqstan oblysynda bıyl 134 jobaǵa 114,4 mlrd teńge qarajat bólinip, 579 shaqyrymnan astam avtomobıl joldaryn jóndeý josparlanyp otyr.
BQO jolaýshylar kóligi jáne avtomobıl joldary basqarmasynyń basshysy Baýyrjan Aıtmaǵambetovtiń Kazinform tilshisine málim etkenindeı, 2024 jyly avtokólik joldaryn jóndeý úshin 1 128 myń tonnadan astam qıyrshyq tas qajet.
Baýyrjan Esqaıyrulynyń sózine qaraǵanda, osyndaı kólemdegi materıaldardy tasymaldaý úshin 16 myńnan astam vagon kerek.
«Kúni búginge barlyq qajetti kólemniń 61 paıyzy (691 myń tonna nemese 10 myń vagon) qamtamasyz etildi. Barlyǵy 10 temirjol vagon quramy jumyldyryldy. Sondaı-aq bıylǵa qajetti 38 myń tonna bıtým kólemin eskere otyryp, mamyrdan qazanǵa deıin aı saıyn shamamen 4,5-5 myń tonna bıtýmmen qamtamasyz etý qajettiligi týyndaıdy. Qazirgi tańda 8,6 myń tonnadan asa bıtým daıyndaldy. Materıaldardy ázirleý jumystary jalǵasýda», - deıdi B.Aıtmaǵambetov.
Basqarma basshysynyń aıtýynsha, sý tasqynyna baılanysty Jaıyq boıynda ornalasqan qum-qıyrshyq tas qospasyn óndiriletin karerler sý astynda qalyp otyr. Osyǵan baılanysty joldardyń jóndelip jatqan ýchaskelerinde jumystardy ýaqtyly bastaý jáne jalǵastyrý úshin qum-qıyrshyq tas qospasynyń tapshylyǵy baıqalady. Degenmen jyl basynda tólengen avanska qum-qıyrshyq tas qospanyń 67 paıyzy daıyndaldy.
«Jol-qurylys jumystaryn sáýir aıynan bastap qyrkúıektiń sońyna deıin aıaqtaý kerektigi barlyq merdigerlerge eskertildi. Biraq óńirdegi sý tasqyny saldarynan qurylys jumystary keshigip bastalýda. Merdiger uıymdarǵa ınertti materıaldardy jetkizýshilermen sharttardy merziminen buryn jasasý jáne tóleý úshin avanstar qarastyrylǵan bolatyn. Qazirgi tańda oblystyq jáne aýdandyq mańyzy bar joldarda 43 nysan boıynsha jalpy somasy 9,5 mlrd teńge avans tólendi», - deıdi basqarma basshysy.
Basqarma málimetine qaraǵanda, 2024 jyldyń josparyna sáıkes oblystyq mańyzy bar 10 avtomobıl joldaryna jóndeý jumystaryn júrgizý kózdelgen. Búginge deıin 3 qaıta jańǵyrtý jáne 1 kúrdeli jóndeý nysandary boıynsha jumystar bastaldy. 4 ortasha jóndeý mamyr aıynyń sońyna deıin bastalmaqshy, buǵan daıyndyq jumystary júrgizilýde. Sondaı-aq taǵy bir nysan boıynsha kelisim-shart jasaqtalýda.
Aýdandarda nysandar boıynsha kópshiliginde jumystar bastaldy.
Batys Qazaqstanda avtomobıl joldarynyń jalpy uzyndyǵy 6 183 km bolsa, sonyń 1 421 shaqyrymy – respýblıkalyq, 4 762-si – jergilikti mańyzy bar joldar.
Bıylǵy 1 qańtardaǵy málimet boıynsha respýblıkalyq mańyzy bar avtojoldardyń normatıvtik jaǵdaıdaǵy úlesi – 73, jergilikti joldarda – 52 paıyz. Jyl qorytyndysy boıynsha jergilikti joldardyń úlesin 58 paıyzǵa jetkizý kózdelýde.
«Jalpy, oblystyq jáne aýdandyq mańyzy bar avtomobıl joldaryn jóndeýge 2019-2023 jyldar aralyǵynda 87,3 mlrd teńge bólinip, 1 059,1 km jol jóndeldi. Sonyń nátıjesinde normatıvtik úles 28-den 52 paıyzǵa jetkizildi. Aýdandar boıynsha osy jyldary aýdandyq mańyzy bar jáne aýylishilik joldarǵa 64,8 mlrd teńge bólinip, 894,9 km jol retke keltirildi. Aýylishilik joldardy jóndeýdiń negizgi bóligi aýdan ortalyqtarynda júrgizildi. Basty maqsat – jóndeýge bólingen qarjyny maqsatty túrde ıgerip, sapaly salynǵan jol kólemin arttyrý», - dedi B.Aıtmaǵambetov.
Eske sala keteıik, budan buryn BQO-da tarıhı Han ordasy aýylyna aparatyn jol salynatynyn jazǵan bolatynbyz.
