BQO avtosalondarynda tutynýshylar quqyǵy jıi buzylady
BQO tutynýshylar quqyǵyn qorǵaý departamentiniń baspasóz qyzmetinen málim etkenindeı, osyǵan baılanysty aryz-shaǵymdar túsýde.
Tutynýshylar ózderi alǵan avtokólikterdiń sapasyna rıza emes. Alaıda memlekettik organǵa júginbes buryn olar avtokólik satý oryndaryndaǵy servıstik ortalyqqa júginip, máseleni beıbit jolmen sheshýge tyrysady. Sosyn qyzmetkerlerdiń salǵyrttyǵy men jaıbasarlyǵy saldarynan aılar boıy jańa kóligin ala almaıdy.
Zańmen qarastyrylsa da, satýshylar sapasyz taýardy aýystyrýǵa kelispeıdi. Tutynýshylardyń basym kópshiligi taýardy ekinshi deńgeıdegi bankten nesıe arqyly rásimdeıtindikten, qıyn jaǵdaı týyndaıdy.
Sol sekildi avtosalondar tutynýshyǵa qosymsha jabdyq alýdy mindetteıdi, bul avtokólikti qymbattata túsedi.
«Mundaı is-áreketter tutynýshy quqyǵyn buzady. «Tutynýshylardyń quqyqtaryn qorǵaý týraly» QR Zańynyń 28-babyna sáıkes bir taýarlardy (jumystardy, kórsetiletin qyzmetterdi) satyp alýdy ózge de taýarlardy (jumystardy, kórsetiletin qyzmetterdi) mindetti túrde satyp alýmen baılanystyrýǵa tyıym salynady», dep habarlady vedomstvodan.
Aıtalyq, ótken jyly avtosalondardyń birinen kólik alǵan qyz departamentke júgingen. Ol avtokólik qunyn tolyqtaı tólegen, tehnıkalyq qujaty men memlekettik tirkeý nómirin rásimdegen. Alaıda avtokólik qalaǵa jetkizilgen kezde satýshy taýar qymbattap ketti degen jeleýmen odan qosymsha 200 myń teńge suraǵan. Ol muny taýar qymbattap ketti dep túsindirgen. Budan keıin qyz sotqa júginbes buryn avtosalonǵa atalǵan Zańnyń 24-babyn túsindirip, shaǵym túsirgen. Bul bap boıynsha taýardyń baǵalar zattańbasymen resimdelgen, saýda obektisiniń ishki jáne (nemese) syrtqy vıtrınalaryna qoıylǵan, kórsetilgen qunyna sáıkes satýshy (daıyndaýshy) satýǵa mindetti, al tutynýshy satyp alýǵa quqyly.
Tek sodan soń ǵana satýshy talabynan bas tartyp, qyz kópten kútken kóligine qol jetkizgen.
Batys Qazaqstan oblysynyń taǵy bir turǵyny 2021 jyldyń tamyzynda 9,5 mln astam teńgege kólik satyp alýǵa avtosalonmen kelisimshartqa otyrǵan. Qazan aıynda 2 mln teńgesin tólegen, sodan keıin avtokólik 120 jumys kúni ishinde jetkizilýi tıis edi. Sondyqtan tutynýshy bıylǵy 15 sáýirden keshikpeı alamyn dep úmittengen. Alaıda 5 sáýirde avtosalondaǵylar tapsyrys berilgen taýardyń ákelinbeıtinin habarlap, aldyn ala tólengen qarjyny keri qaıtaryp alý qajettigin aıtqan.
Kelesi kúni tutynýshy avtosalonǵa kelse, tapsyrys bergen kóligin satýshynyń qoımasynan kórgen.
Budan keıin er adam satýshynyń ústinen sotqa shaǵym túsirgen. Ol kelisimge sáıkes 15 sáýirden bastap kún saıyn taýar qunynyń 0,1 paıyzy kóleminde turaqsyzdyq aıybyn jáne ótemaqy tóleýdi talap etken. Satýshy er adam kelisimshartty buzsa, turaqsyzdyq aıybyn tóleýge kelisken. Biraq tutynýshy aıtqanynan qaıtpaǵan. 12 shildede azamattyq is óndirisi toqtatylyp, taraptar tutynýshyǵa taýardy jetkizý jónindegi kelisimge qol qoıǵan.
Taǵy bir turǵynǵa satýshy birqatar sebepti aıtyp, kólikti berýden bas tartqan. Er adam sotqa júginip, barlyq merzimi ótken kúnder úshin turaqsyzdyq aıybyn tóleýge baılanysty talap aryzyn qaıtyp alǵan.
«Ýaqyt ótken saıyn avtokólik quny óse túsedi, salondar sóıtip baıyp qalǵysy keledi. Olarǵa tutynýshyǵa turaqsyzdyq aıybyn ótegen jeńil, sosyn sol avtokólikti 3-4 mln teńgege qymbatqa satady. Tutynshylardyń bári birdeı óz quqyqtaryn bile bermeıdi, avtodılerler sony paıdalanady», dep túsindirdi departament mamandary.
