BQO ákimi toqsan jastaǵy maıdangerdi qabyldady
Maıdangermen emen-jarqyn áńgimelesken óńir basshysy onyń toqsan jasynyń el táýelsizdiginiń 25 jyldyǵymen tuspa-tus kelip otyrǵanyn atap ótti. Ardagerge maıdandaǵy erligi men beıbit kezeńdegi eńbegi úshin alǵysyn aıtyp, uzaq ómir, myqty densaýlyq tiledi.
«Elimizdiń táýelsizdik alyp, búkil álemge tanylǵanyn kórýdiń ózi - biz úshin baqyt. Elbasymyzdyń bastaýymen Qazaqstanymyz damyp, órkendeı bersin», dedi maıdangerdiń ózi de rızashylyǵyn bildirip.
Aıta keteıik, Meńjan Ǵabdoluly 1926 jyly 26 qarashada Syrym aýdanynda dúnıege kelgen. 17 jasynda soǵysqa attanǵan ol Karel maıdanynda 52-inshi gvardııalyq mınomet polkiniń quramynda Prıbaltıkany jaýdan azat etýge qatysqan. Jeńisti Máskeýde qarsy alǵan maıdanger sodan keıin bes jyl Qıyr Shyǵysta qyzmet etip, aýylyna oraldy. Keıin mılıtsııa mektebin bitirip, ishki ister organdarynda qyzmet etti. Aýyl sharýashylyǵy ınstıtýtynda syrttaı oqyp, zootehnık, aýyldyq keńes tóraǵasy da boldy. Ekinshi dárejeli Otan soǵysy, «Qurmet Belgisi» ordenderimen marapattalǵan maıdanger zaıybymen birge on bala tárbıeledi. Qazir aqsaqaldyń 20 nemeresi, 22 shóberesi bar.
