Bıznesti zańsyz teksergen SES organdarynyń 60-qa jýyq sheneýnigi jazalandy
«Bas prokýratýranyń Quqyqtyq statıstıka jáne arnaıy esepke alý jónindegi komıteti bızneske qatysty 92 tekserýdi zańsyzdep tanyp, 100-ge jýyq kásipkerdiń quqyǵyn qorǵady.
Tekserý nátıjeleri boıynsha kásipkerlik sýbektilerge qatysty tekserýlerdi uıymdastyrý kezinde sanıtarlyq-epıdemıologııalyq baqylaý organdary tarapynan Kásipkerlik kodekstiń 13-taraýynyń talaptary óreskel buzylǵany anyqtaldy.
Kásipkerlerdi tekserý tekserýdi taǵaıyndaý aktisi shyǵarylmastan jáne tıisti túrde tirkelmesten júrgizilgen. Sondaı-aq tekserý máseleleri asyrylǵan, tekserý júrgizý merzimi saqtalmaǵan, sondaı-aq tekserýdi aktide kórsetilmegen laýazymdy tulǵalar júrgizgen», - delingen Bas prokýratýranyń Quqyqtyq statıstıka jáne arnaıy esepke alý jónindegi komıtetiniń habarlamasynda.
Málim etilgendeı, osy jaǵdaılarǵa negizdele tekserý nátıjeleri zańsyz dep tanyldy.
«Anyqtalǵan buzýshylyqtar baqylaýshy memlekettik organ tarapynan negizsiz qysym jasalǵanyn bildiredi, bul jaǵdaı eldegi bıznestiń damýyna kedergi keltiredi.
Qabyldanǵan prokýrorlyq qadaǵalaý sharalarynyń nátıjeleri boıynsha sanıtarlyq-epıdemıologııalyq baqylaý organdarynyń 60-qa jýyq laýazymdy tulǵasy tıisti jaýapkershilikke tartyldy.
Qazirgi tańda osyndaı faktilerge jol bermeý maqsatynda Densaýlyq saqtaý mınıstrligine zańdylyqtyń buzylýyn joıý týraly usynys engizildi», - delingen komıtet aqparatynda.
