Bıznes úshin salyq tapsyrý formalary 30% qysqarady
ASTANA. KAZINFORM — 2026 jyldan bastap shaǵyn bıznes úshin jeńildetilgen deklaratsııa men bólshek salyq rejımi biriktirilip, shaǵyn bızneske arnalǵan biryńǵaı rejım qurylady. QR Ulttyq ekonomıka vıtse-mınıstri Erlan Saǵynaev jańa Salyq kodeksiniń shaǵyn bızneske arnalǵan normalary týraly aıtyp berdi.
Onyń aıtýynsha, bul rejımdegi shekti jyldyq tabys 600 myń AEK-ke deıin nemese 2,4 mlrd teńge kóleminde belgilenedi, degenmen jumyskerler sanyna shekteý qoıylmaıdy.
- Eger jyldyq tabys 24 myń AEK-ten asqan jaǵdaıda eńbekaqy qory somasyna salyq salynatyn tabysty azaıtý qarastyrylǵan. Bul shamamen 100 mln teńge. Osy rejımdi qoldanatyn salyq tóleýshiler QQS pen áleýmettik salyq tóleýshileri bolyp sanalmaıdy. Ózin-ózi jumyspen qamtyǵandarǵa 4 paıyzdyq biryńǵaı eń tómen tólem qarastyrylǵan jańa jeńildetilgen rejım engiziledi, jeke kásipker retinde tirkelý talap etilmeıdi. Biryńǵaı tólemge mindetti zeınetaqy jarnalary, áleýmettik aýdarymdar jáne MÁMS jarnalary kiredi, - dedi E.Saǵynaev Ortalyq kommýnıkatsııalar qyzmetinde ótken brıfıngide.
Ulttyq ekonomıka mınıstrligi men Memlekettik kirister komıteti birlesip, salyq boıynsha esep berý formalaryn 30%-ǵa qysqartty. Shaǵyn jáne orta bıznes úshin deklaratsııalardy avtotoltyrý múmkindigi engiziledi, bul úshin salyq tóleýshi salyq qupııasyn ashýǵa kelisýi kerek.
- Memleket josparly tekserýlerdi tolyǵymen alyp tastady, tek táýekelderdi basqarý júıesi boıynsha tekserýler qalady. Shaǵyn jáne orta bıznes úshin 2026 jylǵa deıingi kezeńderge salyqtyq tekserýler men kameralyq baqylaý tolyǵymen joıyldy. Eger salyq somasy 1 mıllıon teńgeden az bolsa, jer, kólik jáne múlik salyǵy boıynsha tólem esepteýleri de toqtatyldy, - deıdi vıtse-mınıstr.
Aıta keteıik, 2025 jyldyń birinshi jartyjyldyǵynda shaǵyn jáne orta bıznes sýbektileri shyǵaratyn ónim kólemi 25% ósti.