Bizge eń aldymen ınnovatsııaǵa suranysty anyqtaýdy taldaýdyń júıesin jasaý kerek - Ǵylymı keńes tóraǵasy
dep habarlaıdy QazAqparat.
"Ǵylymı uıymdardyń bıznespen tikeleı baılanysy joq. Búkil álemde ınnovatsııalyq suranysty memleket pen iri korporatsııalar qalyptastyrady. Indýstrııaldyq-ınnovatsııalyq damý strategııasy 2003 jyldan beri júzege asyrylýda. Damý ınstıtýttary qurylǵanmen ınnovatsııaǵa ne suranys, ne naqty yntalandyrý usynystary jasalǵan joq. Ol endi ǵana qolǵa alynyp jatyr. Ǵylym men bıznestiń jaqyndasýyndaǵy eń mańyzdy másele ınnovatsııalyq mehanızmder", deıdi Almaty qalasy ákiminiń janynan qurylǵan ınnovatsııa men jańa tehnologııalar jónindegi Ǵylymı keńestiń tóraǵasy Baqytjan Jumaǵulov. Qazaqtyń ál-Farabı atyndaǵy ulttyq ýnıversıteti rektorynyń paıymdaýynsha, ǵalymdar zertteý jumystaryn baǵyttaıtyn bıznestiń naqty ınnovatsııalyq suranysyn bilmeıdi. Bıznes pen ǵylymnyń turaqty suhbatynyń tetikteri áli jasalmaǵan. Keńestik dáýirde jasalǵan tetik qazirgi jaǵdaıǵa sáıkes kelmeıdi. Sondyqtan ony jańadan jasaý kerek.
"Ǵylymı keńestiń aldynda qazir birqatar mindetter tur. Birinshi, ınnovatsııaǵa suranysty anyqtaýdy taldaýdyń júıesin qurý kerek. Ekinshi, qajetti baǵyttar boıynsha izdestirýdi uıymdastyrý. Buǵan Ulttyq, halyqaralyq jáne ıslam elderi ınjenerlik akademııalaryn tartýǵa bolady. Úshinshi, joǵary oqý oryndarynyń ǵylymyn ınnovatsııalyq suranysqa baǵyttaý qajet. Tórtinshi, bıznesti ınnovatsııalyq jobalardy qarjylandyrýǵa yntalandyrýdyń naqty tetikterin jasaý kerek. Besinshi, ǵalymdardyń áleýetin bızneske keńesshilikke paıdalaný. Bul óndirisshilerge ınnovatsııalar men jańa tehnologııalardy irikteýine úlken septigin tıgizedi", deıdi ǵalym.
