Bizdiń jumys kózge kórinbeıdi, sebebi ota jabyq ótedi – almatylyq medbıke
Ol operatsııalyq meıirbıke, talaı adamnyń ómirin qutqarǵan kásibı maman. Osy oraıda QazAqparat tilshisi adam janyn aman alyp qalatyn erekshe mamandyq ıesimen áńgimelesken qurǵan edi.
Sátbaev qalasynyń týmasy Ásem Shılmýrzınanyń operatsııalyq meıirbıke retinde 14 jyldyq tájirıbesi bar. Eńbek jolyn oqýdy bitire sala Qaraǵandy qalasyndaǵy onkologııalyq dıspanserde medbıke bolyp bastaǵan.
«Qazir Almatydaǵy ortalyq klınıkalyq aýrýhananyń ınterventsııalyq kardıologııa jáne endovaskýlıarlyq hırýrgııa bóliminde jumys isteımin. Jalpy Almatyǵa 2014 jyly kóship kelip, A.N. Syzǵanov atyndaǵy ulttyq ǵylymı hırýrgııa ortalyǵynyń kardıohırýrgııa blogynda ota medbıkesi retinde jumys istedim. 2015-2016 jyldary Germanııada Gannover qalasy Medizinische Hochschule Hannover ınstıtýtynda júrek jáne ókpe transplantatsııasy taqyrybynda bilim aldym. 2018 jyldan kúni búginge deıin ortalyq klınıkalyq aýrýhanada eńbek etip jatyrmyn», - deıdi Ásem Shılmýrzına.
Sonymen qatar jerlesimiz ótken jyly Grýzııada American hospital Tbilisi-de «Meıirbıke qyzmetindegi arıtmologııanyń ózekti máseleleri» taqyrybynda biliktiligin arttyrǵan.
Sondaı-aq, Ásem medıtsınany tańdaýyna ne sebep bolǵanyn aıtyp berdi.
«Barlyǵy bala kúnimnen bastaldy. 12 jasymda ákemnen aıryldyq, ol uzaq aýyrdy. 10 jasymda ákemniń aıtqan «qalaýyńnan bas tartpa, men árdaıym birge bolamyn» degen sózi áli esimde. Ákemniń uzaq aýrýy meni kóp nársege úıretti. 10 jasymda qan qysymyn ólsheýdi úırenip, sıstol, dıastoldyń ne ekenin ajyrata bildim. Biraq ómirde bári biz qalaǵandaı bola bermeıdi. Osylaısha medıtsınany erekshe unattym. Qıynshylyqtar men emotsııa meni osy salaǵa alyp keldi. Qıyndyq ony jeńý úshin beriledi degen beker aıtylmaǵan», - deıdi ol.
Almatylyq maman óz kásibi arqyly adamdarǵa kómekteskendi unatatynyn aıtty.
«Operatsııalyq meıirbıkeni patsıent únemi esinde saqtaı qoımaıdy. Meniń 93 jastaǵy ájeme ota jasalyp, oǵan ózim qatysqanym máńgi esimde qalady. Ájemde jedel koronarlyq sındrom anyqtaldy jáne múmkindik az boldy. Biz qoldan kelgendi jasadyq. Aıaq astynan, mezgilsiz ýaqytta, aýyr jaǵdaımen túsetin patsıentter bolady. Ota kezinde qobaljymaımyn. Jalpy ómirde kóp qobaljymaıtyn adammyn, sabyrlymyn. Ota sátti jasalyp naýqas aman qalǵanda, ózińe rıza bolyp, baqytty sezinesiń. Sebebi taǵy bir adamnyń ómiri qutqaryldy. Patsıent otbasyna, jaqyndaryna jáne súıikti jumysyna orala alady. Keıde barymyzdy salsaq ta aýrý jandy qutqara almaıtyn jaǵdaıda bolady. Ondaı jaǵdaı bizge óte aýyr tıedi. Muńaıyp, biraq jumysymyzǵa qaıta oralamyz», - deıdi Á. Shılmýrzına.
Onyń aıtýynsha, operatsııalyq meıirbıke kózge kórinbeıtin maıdandaǵy ásker sekildi. Onyń jumysy kózge kórine qoımaıdy, sebebi ota jabyq esiktiń ar jaǵynda ótedi. Degenmen ota medbıkesi hırýrgtyń oń qoly ekenin umytpaǵan jón.
«Otanyń sátti jasalaýy tek hırýrg emes sonymen qatar operatsııalyq meıirbıkege de qatysty. Bizdiń mamandyǵymyz erekshe. Maǵan bizdiń kásibimizdiń damyp kele jatqany unaıdy. Sarapshylar aıtqandaı, meıirbıke baryp kel, shaýyp kel emes dıplomy bar maman. Bizdiń mamandyqty tańdaǵysy keletin jas túlekterge aıtarym: jaqsylap oılan, bul salaǵa ne úshin keletinińdi aldymen óziń túsinip al. Ota medbıkesi mamandyǵyn kásibin tańdaıtyn jandar belgili bir qasıetterge ıe bolýy kerek. Atap aıtqanda, meıirimdi, ózgeniń jan dertin túsine biletin, qol ushyn sozýǵa daıyn turatyn, sezimtal, zeıindi, uqypty jáne jaýapty bolýdy talap etedi. Medbıke adamnyń anatomııasy men fızıologııasy týraly tereń bilimge ıe bolýy tıis. Shuǵyl jaǵdaıda naýqasqa kómek kórsetip, naýqasty tynyshtandyra alýy kerek», - deıdi meıirbıke.
