Biz áleýmettik jelilerge basymdyq beremiz - Máýlen Áshimbaev
Onyń aıtýynsha, saılaýaldy úgit-nasıxat kezinde jańa aqparattyq texnologııalardy qoldaný qajet. Sebebi bıylǵy saılaýda áleýmettik jelilerdiń róli artyp otyr.
"Iá, osy jolǵy saılaý kezinde alǵash ret qoǵamdyq pikirdi qalyptastyrý men xalyqtyń oıyna áser etý jaǵynan áleýmettik jeliler úlken ról atqaratyn bolady. Osyǵan baılanysty respýblıkalyq qoǵamdyq shtabtyń jumysy kezinde biz áleýmettik jelilerge basa nazar aýdaramyz. Osyny bólek bir baǵyt retinde shyǵaryp otyrmyz. Atalǵan jumysqa partııa qyzmetkerleri men mamandar atsalysady. Áleýmettik jelilerge basymdyq beretin bolamyz. Burynǵy saılaýlarda áleýmettik jeliler ondaı ról oınamaǵan. Al osy joly jaǵdaı múldem basqasha. Sondyqtan bul saılaýdyń úlken bir ereksheligi desek bolady", - dedi M.Áshimbaev jýrnalısterge bergen suxbatynda.
Shtab basshysynyń sózine qaraǵanda, áleýmettik jeliler arqyly úgit-nasıxat sharalary zań boıynsha júrgiziledi. Oǵan eshkimdi mindettemeıdi. Máselen, búginde shtabtyń janynan jastar qanaty quryldy. Oǵan kiretin jastardyń ishinde áleýmettik jelilerde belsendi ári oqyrmany kóp adamdar bar. Olardyń barlyǵy QR Prezıdenttigine kandıdat Qasym-Jomart Toqaevtyń senimdi ókili retinde ózderiniń jeke paraqshalarynda saılaýaldy úgit-nasıxatty júrgize alady. "Kandıdattyń senimdi ókilderi úgit-nasıxat úshin aqsha almaıdy. Al qosymsha bir platformalar nemese pablıkter tartylsa, zań boıynsha aqy tóleý kerek", - dep atap kórsetti M.Áshimbaev.
Aıta keteıik, elordada QR Prezıdenttigine kandıdat Qasym-Jomart Toqaevtyń respýblıkalyq qoǵamdyq shtaby quryldy. Budan bólek, úgit-nasıxat sharalary kezinde qalalyq, oblystyq jáne aýdandyq shtabtar jumys isteıtin bolady. Búgin "Nur Otan" partııasy Tóraǵasynyń orynbasary Máýlen Áshimbaev respýblıkalyq shtabqa kimderdiń kirgenin aıtyp berdi.
