Bıylǵy úsh aıda 3,6 mln sharshy metr baspana paıdalanýǵa berildi

NUR-SULTAN. QazAqparat – Bıylǵy úsh aıda eldegi qurylys sektory 9,5%-ke ósti. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Bıylǵy úsh aıda qurylys sektory joǵary ósý qarqynyn kórsetip, oryndalǵan qurylys jumystarynyń kólemi 9,5%-ke ósti. Kórsetkishtiń oń ósimi 15 óńirde tirkelgen. Qurylys-montajdaý jumystarynyń eń joǵary ósimi Aqmola oblysynda, sondaı-aq Almaty jáne Nur-Sultan qalalarynda baıqalýda», - dedi Á. Qýantyrov Úkimet otyrysynda.

Bıylǵy qańtar-sáýir aılarynyń qorytyndysy boıynsha turǵyn úıdi paıdalanýǵa berý 2,4%-ke ósip, 3,6 mln sharshy metrge jetken. Oń dınamıka 13 óńirde tirkelgen, olardyń arasynda eń joǵarǵy kórsetkish Shymkent qalasynda, Almaty jáne Pavlodar oblystarynda baıqalýda.

Aıta keteıik, jyl basynan beri Qazaqstan ekonomıkasynyń ósý qarqyny 4,4%-ke jetken. Naqty sektordaǵy ósim 5,1%, qyzmet kórsetý salasynda iskerlik belsendilik 3,4%-ke deıin ulǵaıǵan.

Eldegi óńdeý ónerkásibi salalary boıynsha mashına jasaý óndirisiniń 9,4%-ke, onyń ishinde kompıýter, elektrondy jáne optıka quraldar jasaýdyń – 19,7%-ke, avtomobıl jasaýdyń – 18,6%-ke ósýi baıqaldy.

Sondaı-aq qurylys materıaldary – 9,5%-ke, sýsyndar – 18,7%-ke, plastmassa buıymdary – 14,3%-ke, daıyn metall buıymdary – 10,8%-ke, farmatsevtıka ónimderi – 6,4%-ke, kıim óndirisiniń – 13,8%-ke ósýi qamtamasyz etildi. Taý-ken ónerkásibinde óndiris kólemi 4,4%-ke ulǵaıdy.