Bıyl sý tasý qaýpi joǵary – Premer-Mınıstr
«Boljamdarǵa súıensek, bıyl qardyń kóp bolýyna jáne topyraq qabatynyń qatýyna baılanysty sý tasý qaýpi joǵary. Búgingi tańda eldi mekenderden 11 mln tekshe metrden astam qar shyǵaryldy. Degenmen, bul jumys barlyq óńirde tıisti deńgeıde júrgizilip otyrǵan joq. Óńir ákimderi qar shyǵarý jumystaryn kúsheıtýleri qajet», - dedi Álıhan Smaıylov Úkimettiń búgingi otyrysynda.
Premer-Mınıstr ońtústik óńirlerde kúrdeli jaǵdaı qalyptasqanyn, oǵan sý burý arnalarynyń, aryqtardyń, qorǵanysh jer úıindileriniń bolmaýy sebep bolǵanyn atap ótti.
Túrkistan, Jambyl jáne Almaty oblystarynda jaýyn-shashynnyń kóp mólsherine drenajdyq júıelerdiń qýaty jetpedi, keı jerlerde olar múldem joq. Atyraýda qar kúrt erip, kóshelerdi sý basyp qalǵan.
«Sondyqtan, aryqtardy, nóser kárizderin tazartyp, ýaqytsha jer úıindileri men bógetter salý qajet. Indýstrııa mınıstrligi men óńir ákimderi joldardy, kópirlerdi, sý ótkizý qurylystaryn bekitý jumystaryn jalǵastyrsyn. Qazgıdromettiń boljamynda aıtylǵandaı, naýryz aıynda elimizdiń ońtústik jáne shyǵys óńirlerinde aýa temperatýrasy men jaýyn-shashyn mólsheri normadan joǵary bolady. Buǵan daıyn bolý kerek», - dedi Úkimet basshysy.
Sonymen qatar, Premer-Mınıstr myna máselelerdi qamtamasyz etýdi tapsyrdy.
«Tótenshe jaǵdaılar mınıstrligi múddeli memlekettik organdarmen jáne ákimdiktermen birlesip, «Kóktem-2023» respýblıkalyq oqý-jattyǵý sharalary sheńberinde tasqyn qaýpi týyndaǵan jaǵdaıda naqty is-qımyl algorıtmin pysyqtasyn. Jarylǵysh zattar men ınertti materıaldardyń qajetti qoryn daıyndap, habarlandyrý júıeleriniń daıyndyǵyn teksersin. Qosymsha kúshter men quraldar ornalasatyn jerlerdi, evakýatsııalanatyn halyqty qabyldaý pýnktterin jáne aýyl sharýashylyǵy janýarlaryn kóshirý úshin qaýipsiz ýchaskelerdi anyqtaý qajet», - dedi Á. Smaıylov.
Ekinshiden, Ekologııa mınıstrligi óńir ákimderimen birge kommýnaldyq, jekemenshik jáne ıesi joq gıdrotehnıkalyq qurylystardy jóndeý sharalaryn ázirlep, qajet bolǵan jaǵdaıda olardyń tehnıkalyq jaǵdaıy men jóndeý máselesin Sý keńesiniń qaraýyna shyǵarýy qajet.
«Úshinshi, Qazgıdromettiń naýryz aıyna boljamyn eskerip, sý qoımalaryn toltyrý kólemin qaıta qaraý kerek jáne qajet bolsa, olardy aldyn-ala qaýipsiz jaǵdaıda bosatý jóninde sharalar qabyldanýy tıis. Qazirgi tańda bul másele boıynsha respýblıkalyq deńgeıde Premer-Mınıstrdiń birinshi orynbasary jetekshilik etetin úkimettik komıssııa jumys istep jatyr. Komıssııa jaǵdaıdy baqylaýda ustap, sý tasý jaǵdaılarynda jedel áreket etýge daıyn bolýy tıis», - dedi Álıhan Smaıylov.
Foto:primeminister.kz
