Bıyl naýryzda aýyl sharýashylyǵyndaǵy sýbsıdııalaýdy jetildirý qadamdary Úkimetke engiziledi

NUR-SULTAN. QazAqparat – Bıyl naýryz aıynda aýyl sharýashylyǵyndaǵy sýbsıdııalaý júıesin jetildirý boıynsha túpkilikti ózgerister toptamasy Úkimettiń qaraýyna engiziledi. Bul týraly QR Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha salany memlekettik qoldaý júıesin túzetýge baılanysty usynystar ázirlendi. Olar, eń aldymen, júıeniń tetikterin ońaılatýǵa jáne baǵyttardy ońtaılandyrýǵa, sharýashylyq júrgizýdiń mólsheri men nysanyna qaramastan, barlyq sýbektiler úshin teń qoljetimdilikti qamtamasyz etýge baǵyttalatyn bolady. Sondaı-aq, sýbsıdııa alýshylar ózderine naqty ındıkatıvtik kórsetkishterge qol jetkizý boıynsha qarsy mindettemelerdi mindetti túrde qabyldaıtyn norma engiziledi», - dedi E. Qarashókeev Úkimet otyrysynda.

Onyń aıtýynsha, qazirgi ýaqytta usynystardy qurylǵan agroónerkásiptik keshendi memlekettik qoldaýdyń tıimdiligin arttyrý jónindegi jumys toby qarap jatyr. Oǵan salalyq qaýymdastyqtar men odaqtardyń, agrobıznestiń, ǵylymnyń, múddeli memlekettik jáne jergilikti atqarýshy organdardyń ókilderi, sondaı-aq QR Parlamentiniń Senaty men Májilisiniń depýtattary kirdi. Qazirgi ýaqytta jumys tobynyń tórt otyrysy ótti.

«Jumys toptarynyń qorytyndylary boıynsha óńirlerden, salalyq odaqtar men qaýymdastyqtardan, jumys toby múshelerinen agroónerkásiptik keshendi sýbsıdııalaýdyń jańa júıesine kóptegen usynystar men eskertýler kelip tústi, olar júıelendiriledi jáne negizdi bolsa, sýbsıdııalaý júıesin pysyqtaý kezinde eskeriletin bolady. Jumys toptaryn júrgizý qorytyndysy boıynsha 2022 jylǵy naýryzda sýbsıdııalaý júıesin jetildirý boıynsha túpkilikti ózgerister toptamasyn Úkimettiń qaraýyna engizý josparlanýda», - dedi mınıstr.