Bıyl memlekettik qyzmetterdiń 90 paıyzy elektrondy túrde kórsetilýi tıis

NUR-SULTAN. QazAqparat - Bıyl elektrondy túrde kórsetiletin memlekettik qyzmetter kólemin 90 paıyzǵa jetkizý kerek. Bul týraly Úkimet otyrysynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Jyldan jylǵa elektrondy túrde kórsetiletin qyzmetter sany ulǵaıýda. Qazirgi tańda memlekettik tizilimde 700-ge jýyq qyzmet bar. Olardyń 85,5 paıyzy onlaın túrde kórsetiledi. Bizdiń maqsatymyz - bıyl osy kórsetkishti 90 paıyzǵa deıin jetkizý», - dedi ol.

Onyń atap ótýinshe, memlekettik organdardyń ishinde memlekettik qyzmetterdi elektrondy túrge kóshirý barysynda tıisti kórsetkishke jete almaı otyrǵandary bar.

«Osy jumysty ýaqytyly aıaqtaý qajet. Kórsetiletin qyzmetter sapasyn baqylaý Memlekettik qyzmet ister agenttiginiń quziretinde. Olar júrgizgen qoǵamdyq monıtorıng nátıjesin qarasaq, elimizdiń aýmaqtarynda halyqtyń memlekettik qyzmettermen qanaǵattaný deńgeıin kóterý qajet ekendigi aıqyn. Ol úshin aldymyzǵa qoıylatyn birqatar ashyq másele bar. Mysaly, memlekettik qyzmetti alý úshin halyq áli de tikeleı memlekettik organǵa nemese ákimdikke júginedi. Osyndaı qyzmetter sany - 200-den astam», - dedi mınıstr.

Baǵdat Mýsın máseleni taldaý úshin Bas prokýratýramen birlesip, halyqtan kelip túsken ótinishterdi zerttegenderin aıtady.

«Nátıjesinde 2 mln-nan astam ótinishterdiń 30 paıyzy memlekettik qyzmetke ekeni anyqtaldy. Osyndaı jaǵdaıda Halyqqa qyzmet kórsetý ortalyqtaryna qaraǵanda merzimderi buzylýy múmkin. Óıtkeni, baqylaýǵa arnalǵan aqparattyq júıege kirmeıdi jáne jeke qarym-qatynas kezinde sybaılas jemqorlyq bolýy múmkin. Bul máseleni sheshý maqsatynda barlyq qyzmetterdi balamasyz tek HQKO-larda nemese elektrondy túrde kórsetý qajet»,- dedi ol.