Bıyl mektep bitirýshiler 5 pánnen memlekettik emtıhan tapsyrady

ASTANA. QazAqparat - Kezekti oqý jyly aıaqtaldy. Ár túlektiń aldynda ómirindegi mańyzdy qadamdardyń biri – qorytyndy attestattaýdan ótý kútip tur. Bilim salasynda sapany qamtamasyz etý komıtetiniń tóraǵasy Ernur Dáýenov bıyl emtıhan tapsyrý rásimi qalaı ótetinin túsindirdi, dep habarlaıdy QazAqparat.

Onyń aıtýynsha, oqý baǵdarlamasyn meńgerý nátıjesin anyqtaý úshin 9 (10) synyp oqýshylary qorytyndy bitirý emtıhanyn, 11 (12) synyp oqýshylary memlekettik bitirý emtıhanyn tapsyrady.

Emtıhandy komıssııa qabyldaıdy.

Onyń quramyna pán muǵalimderi, mektep dırektorynyń orynbasarlary, qoǵamdyq uıymdardyń jáne ata-analar komıtetiniń ókilderi kiredi.

Komıssııany mektep dırektory nemese ony almastyratyn adam basqarady.

Komıssııa músheleriniń sany bir bitirýshi synyp-keshen bolǵan jaǵdaıda keminde bes adamnan, al eki jáne odan kóp bitirýshi synyp-keshen bolsa keminde jeti adamnan turady.

2-13 maýsym aralyǵynda 9 (10) synyp oqýshylary qorytyndy bitirý emtıhanyn tapsyrady:

2 maýsym– esse nysanynda oqytý tili boıynsha jazbasha emtıhan, gýmanıtarlyq tsıkl pánderin tereńdetip oqytatyn mektepter úshin – jazbasha jumys (maqala, áńgime, esse);

6 maýsym – matematıka (algebra) boıynsha jazbasha emtıhan;

9 maýsym – orys/ózbek/uıǵyr/tájik tildi synyptarda qazaq tili men ádebıeti boıynsha jazbasha emtıhan (mátinmen jumys, mátin boıynsha tapsyrmalardy oryndaý) jáne qazaq tilinde oqytatyn synyptarda orys tili men ádebıeti boıynsha jazbasha emtıhan (mátinmen jumys, mátin boıynsha tapsyrmalardy oryndaý);

13 maýsym - tańdaý páni boıynsha jazbasha emtıhan (fızıka, hımııa, bıologııa, geografııa, geometrııa, Qazaqstan tarıhy, dúnıejúzilik tarıh, ádebıet (oqytý tili boıynsha), shet tili (aǵylshyn/frantsýz/nemis), ınformatıka).

5-19 maýsym aralyǵynda 11 (12) synyp oqýshylary memlekettik bitirý emtıhandaryn tapsyrady:

5 maýsym – oqý tili boıynsha jazbasha emtıhan;

8 maýsym – algebra jáne taldaý bastamalary boıynsha jazbasha emtıhan;

12 maýsym – tarıh páninen aýyzsha emtıhan;

15 maýsym – ózbek/uıǵyr/tájik/orys tilderinde oqytatyn mektepterde/synyptarda qazaq tili men ádebıeti boıynsha jáne qazaq tilinde oqytatyn mektepterde/synyptarda orys tili men ádebıeti boıynsha jazbasha emtıhan;

19 maýsym – tańdaý páni boıynsha jazbasha emtıhan (fızıka, hımııa, bıologııa, geografııa, geometrııa, dúnıejúzi tarıhy, quqyq negizderi, ádebıet (oqytý tili boıynsha), shet tili (aǵylshyn/frantsýz/nemis), ınformatıka).

«Bitirý emtıhandary qarsańynda qorytyndy attestattaý erejeleri men normalaryn múltiksiz saqtaýdyń mańyzyn atap ótkim keledi. Akademııalyq adaldyq qaǵıdattaryn saqtaý boıynsha muǵalimderdiń de, oqýshylardyń da óz kezeginde jaýapkershilik aımaǵy bar. Emtıhandy obektıvti ótkizý barysy bilim sapasyn arttyrýǵa yqpalyn tıgizetinin túsiný óte mańyzdy. Mekteptiń abyroıy, sondaı-aq onyń bilim keńistigindegi bedeli tek tsıfrlyq kórsetkishterge ǵana emes, sonymen qatar túlekterdiń sapaly daıyndyǵyna, olardyń tereń bilimine, biregeı bilim berý dástúrine negizdelgen», - deıdi komıtet tóraǵasy.

Onyń aıtýynsha, akademııalyq adaldyq joly adamgershiligi joǵary, básekege qabiletti jáne jaýapty qoǵamnyń azamatyn qalyptastyrýǵa múmkindik beredi.