Bıyl qandastarǵa 490 bilim granty bólindi

ASTANA. QazAqparat – Ǵylym jáne joǵary bilim mınıstrligi bıyl memlekettik bilim granttary qalaı bólinetindigin jarııa etti, dep habarlaıdy QazAqparat tilshisi.

«2023-2024 oqý jylyna memlekettik tapsyrys kólemi - 88 204 grant, bakalavrıat úshin - 73 061 grant. Daıyndyq baǵyttary boıynsha: pedagogıka – 15 923, óner jáne gýmanıtarlyq ǵylymdar – 1 615, áleýmettik ǵylymdar – 960, bıznes, basqarý jáne quqyq – 1 223, jaratylystaný ǵylymdary – 7 388, aqparattyq-kommýnıkatsııalyq ǵylymdar – 12 037, ınjenerlik – 21 675, aýyl sharýashylyǵy jáne bıoresýrstar – 2 345, qyzmetter - 2 200, veterınarııa – 975. Sheteldik azamattardyń halyqaralyq qatynastar boıynsha bilim alýyna – 365 grant. Qos dıplom bilim berý baǵdarlamasy boıynsha joǵary jáne joǵary oqý ornynan keıin bilim uıymdarynda stýdentterdiń oqýyna - 1 500 grant. M. Lomonosov atyndaǵy Máskeý memlekettik ýnıversıteti Qazaqstan fılıalyna – 125 grant. Sheteldik JOO-lar fılıaldaryna – 200 grant», - delingen mınıstrliktiń agenttiktiń resmı saýalyna bergen jaýabynda.

Vedomstvo málimetinshe, «Nazarbaev Ýnıversıtetine» shetel azamattaryn qosa alǵanda 1 1 92 grant, JOO-lardyń daıyndyq bólimsheleriniń tyńdaýshylaryna – 1 750 grant, «Nazarbaev Ýnıversıtetiniń» daıyndyq bólimshesine 600 grant bólinip otyr.

Sheteldik azamattardyń, onyń ishinde Qazaqstan Respýblıkasynyń azamaty emes ulty qazaq qandastarǵa 490 grant beriledi. Rezervte 100 grant bar. «Máskeý avıatsııa ınstıtýtynyń» «Voshod» fılıalynda bilim alýǵa 45 grant bólingen.

Al, magıstratýraǵa 13 253 grant, doktorantýraǵa 1 890 grant bólinip otyr.