Bıyl Baıqońyrdan 17 zymyran ushyrylady

BAIQOŃYR. QazAqparat - 2018 jylǵy Baıqońyr ǵarysh aılaǵyndaǵy ushyrylymdardyń jospary bekitildi, dep habarlaıdy «QazAqparat» HAA.

QR Qorǵanys jáne aeroǵarysh ónerkásibi mınıstrliginiń baspasóz qyzmetiniń aqparaty boıynsha, 2018 jyly Halyqaralyq ǵarysh stantsııasy (HǴS) baǵdarlamasy boıynsha jeti ushyrylym bolady. Olar - bortynda halyqaralyq ekıpajy bar tórt «Soıýz MS» ǵarysh kemesi men «Progress MS» serııasynyń kóliktik úsh júk zymyrany.

Bıyl kommertsııalyq ushyrylym baǵdarlamasy boıynsha orbıtaǵa ǵarysh qondyrǵylaryn jetkizetin Baıqońyr ǵarysh aılaǵynan tórt ret «Proton-M» zymyran-tasyǵyshyn ushyrý josparlanǵan.

Sondaı-aq, 2018 jylǵa «Van Veb» ǵarysh apparatyn ushyrý úshin «Soıýz-2» zymyran-tasyǵyshyn eki ret ushyrý kózdelip otyr.

Aıta keterligi, Baıqońyr ushyrý baǵdarlamasyn aqpanda bastaıdy, 2018 jyldyń birinshi toqsanynda Baıqońyr ǵarysh aılaǵynan HǴS baǵdarlamasy boıynsha eki ushyrylym júzege asyrylady.