Bıyl Astanadaǵy balabaqsha pedagogteriniń birazy arnaıy kýrstardan ótedi

ASTANA. QazAqparat – Astanadaǵy mektepke deıingi bilim berý uıymdarynda 4 myńnan astam pedagog jumys istep jatyr. Bul týraly elordanyń kommýnıkatsııalar qyzmetindegi baspasóz máslıhatynda qalalyq Bilim basqarmasy basshysynyń orynbasary Serik Ádilbaev aıtty, dep habarlaıdy QazAqparat tilshisi.

«2022-2023 oqý jylynda bilim berý uıymdarynda 21 159 pedagog jumys istep jatyr. Onyń ishinde mektepke deıingi uıymdarda 4 291 bolsa, sonyń arasynda 2 719-y memlekettik uıymdarda qyzmet etip júr», - dedi S. Ádilbaev.

Atap aıtqanda, elordada jalpy 64 465 balany qamtyp turǵan 457 mektepke deıingi bilim berý uıymy jumys istep tur. Onyń arasynda 100-i memlekettik balabaqsha, 354-i jekemenshik uıym. Jeke sektordaǵy mektepke deıingi bilim berý uıymdarynyń 346-sy memlekettik tapsyrys boıynsha qyzmetin jalǵastyryp otyr.

«Pedagogterdi attestattaý boıynsha talaptary aıasynda olar tıisti kýrstardan ótýi tıis. 2022 jyly mektepke deıingi bilim berý uıymdarynda 576 tárbıeshi, 25 ádisker, 50 meńgerýshi, ıaǵnı jalpy sany 651 (14,8%) pedagog atalǵan oqytý kýrstardan ótti. 2023 jyly mektepke deıingi bilim berý salasyndaǵy 1 062-sin (43,4%) osy kýrstardan ótkizý josparlanyp otyr», - dedi ol.

Sonymen qatar Serik Ádilbaev qazirgi kezde qalada balabaqsha meńgerýshisi qyzmeti boıynsha 14 bos oryn bar ekenin aıtty. Bul qyzmetke taǵaıyndaý konkýrs nátıjeleri boıynsha júzege asyrylady.

Budan buryn habarlanǵandaı, byltyr qyrkúıek aıynda balabaqsha pedagogterin attestattaýdyń jańa júıesi engiziletini aıtylǵan edi.