Bıyl Astana, Almaty jáne Shymkent 15 paıyz 5G ınternetpen qamtylady

ASTANA. QazAqparat – Jyl sońyna deıin respýblıkalyq mańyzy bar qalalar 15 paıyzǵa 5G ınternetimen qamtylady dep kútilýde. Bul týraly QR Tsıfrlyq damý mınıstrliginiń Telekommýnıkatsııa komıtetiniń tóraǵasy Erjan Meıramov málim etti, dep habarlaıdy QazAqparat tilshisi.

«5G engizý respýblıkalyq mańyzy bar 3 qalada (Astana, Almaty, Shymkent) pılottyq rejımde júrip jatyr. Ótken jyldyń jeltoqsanynda 5G radıojıilikterine aýktsıon uıymdastyryldy. Sonymen qatar baılanys operatorlaryna lıtsenzııalyq mindetter júkteldi. Oǵan sáıkes bıyl jyl sońyna deıin Astana, Almaty jáne Shymkent qalasy 15% 5G ınternetpen qamtylýy tıis. Al 2027 jylǵa qaraı atalǵan qalalardyń 75% 5G engiziledi. Sol sııaqty 2024 jyldan bastap 5G oblys ortalyqtaryna engizile bastaıdy», - dedi Erjan Meıramov atalǵan mınıstrliktiń keńeıtilgen alqa otyrysynan keıin BAQ ókilderiniń saýalyna jaýap bere turyp.

Aıta ketsek, Úkimet basshysy elimizde 5G engizýdi 2027 jylǵa deıin aıaqtaýdy tapsyrǵan edi.

«Mınıstrlik uıaly baılanys pen ınternettiń sapasyna taldaý júrgizýi qajet. Sonyń negizinde tıisti is-sharalar ázirlenip, ol «Qoljetimdi ınternet» ulttyq jobasy sheńberinde qabyldanýy tıis. Búginde elimizde 5G uıaly baılanysyn engizý jumystary júrip jatyr. Birinshi kezekte respýblıkalyq mańyzy bar qalalar men oblys ortalyqtaryn qamtý josparlanyp otyr. Atalǵan jumys 2027 jyly aıaqtalýy kerek», - degen mindet júktedi Álıhan Smaıylov.

Eske salaıyq, byltyr jeltoqsanda elimizde alǵash ret 5G úshin radıojıilikterge ashyq aýktsıon ótken edi.

Ashyq kózderden alynǵan foto