Bıyl agrosaqtandyrýdy sýbsıdııalaýǵa 3,3 mlrd teńgege jýyq qarjy bólinedi

NUR-SULTAN. QazAqparat -Elimizdiń sharýalary egis alqaptaryn qurǵaqshylyqtan saqtandyra alady. Ony úıden shyqpaı-aq Qoldau.kz portaly arqyly jasaýǵa bolady. Al saqtandyrý qunynyń jartysyn memleket tóleıdi, dep habarlaıdy QazAqparat.

QR Aýyl sharýashylyǵy mınıstrliginen málim etkendeı, ótken jyly bastalǵan onlaın-saqtandyrý jaqsy nátıje kórsetip otyr: fermerlerge 535 mln teńgeniń saqtandyrý tólemi berildi. Bul rette, saqtandyrý jaǵdaıy týyndaǵany jóninde komıssııa músheleri emes, spýtnıktik málimetterge negizdelgen aqparattyq júıe anyqtaǵan. Bul, saqtandyrý tólemi mehanızminiń obektıvtiligi men ashyqtyǵyn qamtamasyz etti.

«Bıyl agrosaqtandyrý shyǵyndaryn sýbsıdııalaýǵa 3,3 mlrd teńge bólý josparlanyp otyr.

Agrosaqtandyrý salasyndaǵy operator - «QazAgro» Ulttyq basqarýshy holdıngi» AQ-nyń enshiles kompanııasy Aýyl sharýashylyǵyn qarjylaı qoldaý qory. Memleket operator arqyly aýyl sharýashylyǵy taýaryn óndirýshilerge saqtandyrý syıaqysyn tóleýge arnalǵan shyǵyndardyń bir bóligin óteıdi.

Barlyq saqtandyrý protsesi «Agroinsurance» servıstik júıesi ornalasqan Qoldau.kz platformasynda iske asyrylady», - dedi mınıstrlikten.

Saqtandyrýǵa dándi daqyldar (bıdaı, arpa, júgeri, suly) jáne maıly daqyldar (kúnbaǵys, raps, zyǵyr) jatady. Egis alqaptaryn Aqmola, Aqtóbe, Batys Qazaqstan, Qaraǵandy, Qostanaı, Pavlodar, Soltústik Qazaqstan, Shyǵys Qazaqstan oblystarynyń sharýalary saqtandyra alady.

Egis alqabyn saqtandyrý úshin sharýa:

· elektrondy tsıfrlyq qoltańba arqyly saıtqa tirkeledi;

· jeke kabınetke kiredi;

· tizimnen saqtandyrylýy tıis egis alqabyn tańdaıdy;

saqtandyrý kompanııasyn tańdaıdy (Jýsan Garant, Vıktorııa, Nomad Insurance);

· saqtandyrý qunynyń 50% tóleıdi.

«Osy qarapaıym protsedýralardan keıin fermer kún saıyn jeke kabıneti arqyly topyraqtaǵy ylǵal deńgeıin baqylaýǵa múmkindik alady. Ol úshin únemi onlaında bolýdyń qajeti joq. Eger júıe ylǵal jetispeýshiligin nemese artyq mólsherin tirkese, fermer elektrondy poshtaǵa habarlama ala alady. Osydan keıin elektrondy tsıfrlyq qoltańba arqyly tólem ótinishine qol qoıýy kerek.

Barlyq protsess avtomattandyrylǵan jáne saqtandyrý shartyna sáıkes saqtandyrý jaǵdaıy tirkelgen sátten bastap 15 jumys kún ishinde tólem jasalady», - dep naqtylady vedomstvodan.