Bıyl 7 myń jaldamaly páter beriledi

ASTANA. QazAqparat - Bıyl 7 myń jaldamaly páter beriledi. Bul týraly búgin Astanada QR Prezıdenti Nursultan Nazarbaevtyń qatysýymen ótip jatqan elimizdiń «Nurly jol» jáne ındýstrıaldy-ınnovatsııalyq memlekettik baǵdarlamalarynyń iske asyrylý barysyna arnalǵan jalpyulttyq telekópir barysynda QR Ulttyq ekonomıka mınıstri Erbolat Dosaev málim etti.

«2015-2016 jyldary jaldamaly úılerdi salýǵa jáne satyp alýǵa Ulttyq qordan 145 mlrd. teńge qarastyrylǵan. Aǵymdaǵy jyly 7 myńnan astam páter salynyp, satyp alynady. Bul úshin respýblıkalyq bıýdjet qarjysyn qosa alǵanda 122 mlrd. teńge bólingen», - dedi ol.

Mınıstrdiń sózine qaraǵanda, aǵymdaǵy jyldyń naýryz-sáýir aılarynda jergilikti atqarýshy organdarda kezekte turǵandar arasynda jalpy aýmaǵy 133 myń sharshy metr bolatyn 2437 páter taratylǵan.

«Aǵymdaǵy jyldyń maýsym aıynda jalpy aýmaǵy 21 myń sharshy metrdi quraıtyn kezekti 360 páterdi bólý bastaldy. Qazirgi ýaqytta 2015 jyly elimiz boıynsha berilýi tıis jalpy aýmaǵy 200,9 myń sharshy metrdi quraıtyn 3280 jaldamaly páterdiń qurylysy júrgizilýde», - dedi E.Dosaev.