Bıyl 7 aıda 1 491 esirtki qylmysy tirkeldi - ІІM

NUR-SULTAN. QazAqparat – Bıyl elimizdiń aýmaǵynda 23 esirtki zerthanasy joıyldy. Bul týraly QR Іshki ister mınıstrligi Esirtki qylmysyna qarsy is-qımyl departamentiniń ókili Danııar Oralov aıtty, dep habarlaıdy QazAqparat tilshisi.

«Bıyl 7 aıda 1 491 esirtki qylmysy tirkeldi. Onyń ishinde 874 satý faktisi jáne 227 asa iri kólemde esirtkini saqtaý deregi anyqtaldy. Jyl basynan beri elimizdiń aýmaǵynda barlyǵy 4 jarym tonna túrli esirtki zattary tárkilendi. Onyń ishinde 2,2 tonna marıhýana, 400 keliden astam gashısh jáne 87 keli sıntetıkalyq esirtki alyndy», - dedi departament ókili mınıstrliktiń baspasóz qyzmeti alańynda ótken brıfıngide.

Onyń dereginshe, Nur-Sultan qalasy, Atyraý men Pavlodar oblystarynyń aýmaǵyna kannabıs tobynyń jáne sıntetıka esirtkilerin jetkizýmen ári satýmen aınalysyp kelgen 3 uıymdasqan qylmystyq toptyń joly kesildi.

«Sıntetıkalyq esirtkige baılanysty 890 qylmys tirkeldi. Nur-Sultan, Almaty, Aqtóbe, Aqmola, Shyǵys Qazaqstan, Soltústik Qazaqstan, Qyzylorda, Qostanaı, Jambyl, Pavlodar, Mańǵystaý jáne Qaraǵandy oblystarynda 23 esirtki zerthanasy joıyldy», - dedi Danııar Oralov.